Sindikate agter dieseltekort
DIE ongekende diefstal van brandstof deur goed georganiseerde misdaadsindikate en die beskadiging van pyplyne in die proses is klaarblyklik die grootste oorsaak vir die dieseltekort in die binneland wat die oesproses ontwrig en voedselsekerheid bedreig, sê dr. John Purchase, uitvoerende hoof van die landbousakekamer Agbiz.
“Die hoofpyplyn van Durban na Germiston was weer toe weens diefstal in die Van Reenenspasomgewing,” sê Purchase. “Skepe wat geraffineerde brandstof inbring, kon nie aflaai nie, want hul vragte word regstreeks in die pyplyn ingepomp. Die beskikbaarheid in Durban is goed, maar die logistiek om die diesel per vragmotor of tenkwa uit die hawegebied te kry, is ’n nagmerrie.
“Blykbaar is brandstofdepots en -pompstasies nasionale sleutelpunte, maar nie die pyplyn self nie. Iets drasties sal gedoen moet word om die pyplyn te beskerm.”
30 GEVALLE
Mnr. Christo van der Rheede, adjunkuitvoerende direkteur van Agri SA, sê sedert April vanjaar was daar reeds meer as 30 gevalle van diefstal uit die pyplyne, waartydens meer as 2 miljoen liter brandstof gesteel is. Daar is ’n ondergrondse netwerk van 3 800 km petroleum- en gaspyplyne en diewe rig groot skade aan. “Diesel moes met vragmotors vanaf ons hawens vervoer word, wat die koste verhoog.
“Boere wat produkte soos mielies, sitrus en ander gewasse oes, word veral ernstig benadeel weens die verhoging in koste en beperkte beskikbaarheid van diesel in sekere provinsies.
“Die werklike situasie verskil van die prentjie wat dikwels geskilder word deur diegene wat verantwoordelik is vir die bestuur van dieselvoorsiening. Boere sukkel om diesel te koop.”
Agbiz kry ook terugvoer dat boere sukkel om diesel te kry ondanks die reëling met die Suid-Afrikaanse Petroleumbedryfsvereniging dat voorsiening aan die landbou voorkeur sal geniet.
“Ons het depotname deurgegee wat sleutelpunte vir die landbou is. Dit lyk of die probleem nog ’n week of wat met ons gaan wees,” sê Purchase.
NAGMERRIE
Mnr. Corné van der Walt van Agri Petroleum, ’n grootmaatverskaffer in Bothaville wat 90% van sy diesel aan boere verskaf, sê dit is ’n nagmerrie om diesel in die hande te kry. “Ons probeer die beskikbaarheid bestuur om ons boere te help, maar die situasie is nou die ergste wat dit nog was. Gelukkig het die stropery in ons gebied nog nie sy hoogtepunt bereik nie.”
Hy reken dit het meer ’n logistieke probleem geword en dat die prysverhoging van R2/liter op 1 Julie ook die vraag by verbruikers verhoog het.
Die DA het ’n dringende parlementêre debat gevra oor die tekort en die voedselkrisis waartoe dit kan lei. Die parlementêre portefeuljekomitee vir minerale hulpbronne en energie het egter gesê hy is tevrede met die departement van minerale hulpbronne en energie se versekering dat dit ’n tydelike logistieke kwessie is en wil die saak eers op 19 Augustus bespreek.
Mnr. Kevin Mileham, DAskaduminister vir minerale hulpbronne en energie, glo die departement en die komitee is uit voeling met die werklikheid.
Intussen het Agri SA en sy provinsiale affiliasies saam met Transnet ’n veldtog begin om boere aan te moedig om enige poging om die pyplyn te beskadig om diesel te steel, aan te meld by
of SAPS Crime
Stop
–