Mielievooruitsigte verklein ietwat
DIE verwagte kommersiële mielie-oes vir 2020 is effens afwaarts aangepas, maar is op 15,5 miljoen ton steeds die tweede grootste oes ooit, en na verwagting sal meer as ’n miljoen ton reeds teen middel Augustus uitgevoer wees.
Die Oesskattingskomitee se vyfde skatting van die seisoen is 0,48% of 75 600 ton minder as Mei s’n, maar steeds 38% meer as verlede jaar se oes.
Mnr. Paul Makube, senior landbou-ekonoom by FNB, sê die afname kan hoofsaaklik toegeskryf word aan minder geelmielies in Mpumalanga en Gauteng as aanvanklik geraam.
“Luidens verslae uit Mpumalanga het sommige gebiede ’n ernstige midsomerdroogte ondervind en hoewel toestande teen die einde van die seisoen verbeter het, was die skade aan opbrengste reeds daar.”
Die geskatte totale oppervlakte onder mielies is 2,6 miljoen ha, en die verwagte opbrengs 5,94 t/ha. Daarvan is 1,6 miljoen ha onder witmielies en die res onder geelmielies. Die witmielie-produksieskatting is onveranderd gelaat op 9,1 miljoen ton, met ’n verwagte opbrengs van 5,61 t/ha. Die geelmielieskatting van 6,4 miljoen ton is 1,16% of 75 600 ton minder is as die vorige skatting. Die geelmielie-opbrengs is 6,47 t/ha.
UITVOER
Daar word steeds verwag dat sowat 2,7 miljoen ton mielies in die bemarkingsjaar 2020-’21 uitgevoer sal word.
Luidens die SA Graaninligtingsdiens (Sagis) se jongste syfers was daar teen 19 Junie (die agtste week van die bemarkingsjaar) reeds 370 000 ton mielies uitgevoer.
Wat geelmielies betref, is 227 600 ton uitgevoer waarvan 95 000 ton na Suid-Korea en 84 000 ton na Taiwan verskeep is. Sowat 142 300 ton witmielies is uitgevoer waarvan 81 000 ton na Zimbabwe is en 14 000 ton na Namibië.
Handelaars se uitvoervoornemens dui daarop dat daar tot middel Augustus nog 708 000 ton mielies uitgevoer sal word waarvan 576 000 ton geel en 132 000 ton wit sal wees.
ANDER SOMERGRANE
Die komitee het sy produksieskatting vir sojabone ook afwaarts aangepas met 2% (29 500 ton) tot 1,26 miljoen ton. Vir sonneblomsaad is die skatting onveranderd op 765 960 ton. Die geskatte oppervlakte beplant met sojabone is 705 000 ha en die verwagte opbrengs is 1,79 t/ha. Die oppervlakteskatting vir sonneblomsaad is 500 300 ha, terwyl die verwagte opbrengs 1,53 t/ha is. Die verwagte grondbone-oes is met 16.5% afwaarts aangepas tot 52 140 ton, sorghum is met 1,5% afwaarts aangepas tot 134 000 ton en droëbone is 3% minder op 69 000 ton.