Van oraloor
’N VOORMALIGE politikus is nou aan die stuur van die Johannesburgvarsproduktemark.
Me. Leanne Williams, voorheen van die Patriotic Alliance, is aangestel as die nuwe uitvoerende hoof nadat die vorige uitvoerende hoof, mnr. Ayanda Kakana, ’n pos in die private sektor aanvaar het.
Williams beoog om strategiese vennootskappe tussen die Johannesburgse stadsraad, die mark, agente en produsente uit te bou. “Beduidende klem sal gelê word op die uitbou van die verhouding met die kopers en verskaffers wat aan die informele mark voorsien om toekomstige ontwikkelingskerns te skep vir opkomende boere en agente.
“Veranderinge word beoog aan die mark se sakemodel en verandering is nie altyd maklik nie. Die huidige pandemie se einde is nog nie in sig nie en ons moet die voorgeskrewe regulasies insluit by hoe ons sake doen. In hierdie kwessies lê die geleenthede vir die mark in die vennootskappe tussen al die belanghebbendes.”
Williams wil die bedreiging wat regstreekse lewerings vir die mark inhou, aanpak met tegnologie en innovering, maar bowenal met ’n skoon, veilige omgewing waarin alle belanghebbendes in die waardeketting graag wil handel dryf. “Op kort termyn moet instandhouding gedoen word, en verkoelingsgeriewe en piesangrypmaakkamers moet vernuwe word,” sê Williams.
Williams was in 2016 die ondervoorsitter van die Patriotic Alliance, ’n politieke party. Sy was toe in die wedloop om die burgemeester van Johannesburg te word.