Uitvoerramp dreig
MNR. DAVID MAYNIER, WesKaapse minister van finansies en ekonomiese geleenthede, het sy kommer uitgespreek omdat drie skeepsmaatskappye nie meer by Kaapstad wil aandoen nie, of ’n kongestie-premie vanaf vandeesmaand wil instel. Hy doen ’n beroep op mnr. Pravin Gordhan, minister van openbare ondernemings, om dringend in te gryp.
Sitrus wat via die Kaapstadhawe uitgevoer moet word, word nou per vragmotor na Port Elizabeth vervoer weens reusevertragings in dié hawe, wat reeds vóór die Covid-19-inperking swaar getrek het om vragvolumes betyds te laai.
Vertragings het tot só ’n mate vererger dat Deutsche Afrika-Linien (DAL), ’n vername internasionale skeepsmaatskappy, op 24 Junie aangekondig het dat hy hom gedeeltelik en tydelik van die Kaapstad-hawe onttrek.
Mnr. David McCallum, besturende direkteur van DAL Agency in Suid-Afrika, het aan die webwerf Freight News gesê dit was weens vertragings en ’n gebrek aan kommunikasie van die haweowerhede. Hulle sal Port Elizabeth en Coega gebruik totdat kapasiteit by Kaapstad se vraghouerterminaal verbeter het.
Mnr. Mitchell Brooke, bestuurder van logistieke ontwikkeling by die Sitruskwekersvereniging (SKV), sê lande wat die vraghouerterminaal gebruik, was sedert die begin van die inperking in Maart baie bekommerd oor die vermindering van die bedryfskapasiteit by Transnet se haweterminale.
“Gedurende die eerste week van die inperking het 21 vragskepe gelê en wag om die vier groot uitvoerhawens binne te kom. Dit het gelei tot vertragings in die uitvoer van sitrus.”
DRUK
Dit was vroeg in April nog ’n rukkie voor die hoogtepunt van die sitrus-uitvoerseisoen, wat die SKV tyd gegee het om druk op Transnet en die regering uit te oefen om kapasiteit by die vraghouerterminaal te vergroot. Teen einde April was Durban, Port Elizabeth en Ngqura op 100% kapasiteit danksy streng prosedures om personeel te beskerm.
Brooke sê Kaapstad se vraghouerterminaal funksioneer op die oomblik op 50% kapasiteit omdat baie hawewerkers deur Covid-19 geraak is.
VERSTOP
Me. Mpumi, Transnet se bestuurder van Kaapstad se haweterminaal-afdeling, sê ook die beskikbaarheid van personeel is ontwrig omdat Kaapstad die episentrum van die Covid-19-pandemie is.
Die vertragings is vererger omdat slegs noodsaaklike goedere tydens vlak 5 van die inperking, wat op 27 Maart begin het, toegelaat is. “Dit het daartoe gelei dat die hawestelsel verstop word deur vragte wat volgens die regering se regulasies as nie-noodsaaklik verklaar is. Landbouprodukte is egter nie hierdeur geraak nie,” sê Dweba-Kentana.
Sy sê aanvanklike vertragings en personeeltekorte is ietwat verlig danksy die verslapping van die inperking. Die vraghouerterminaal is nou teen “net minder as 60% in bedryf” en die veeldoelige terminaal 75%.
“Tans is 40% van ons personeel aan diens,” sê Dweba-Kentana.
–