LAMPRYSE GEE BOERE IETS OM OOR TE GLIMLAG
’N STEWIGE vraag na skaapvleis en ’n effense tekort aan die aanbodkant lei tans tot goeie lampryse.
Volgens mnr. Gert Jordaan, hoof van BKB se internetveilings, neig produsentepryse vir skaapvleis die afgelope twee maande hoër. Die speenkalfprys, wat daarenteen effens papper is, verbeter ook.
Een van die produsente wat op BKB se weeklikse internetveiling vir stoorlammers en speenkalwers goed gevaar het, is die FEMDohne-Merinotelers van mnr. Frans Marx en sy seun, Andries, van die plaas Sewefontein, Burgersdorp. Hul groep 282 bemarkbare Dohne-slaglammers met ’n gemiddelde gewig van 53 kg het die betreklik hoë prys van R42/kg lewend behaal.
Dr. Frikkie Maré, landbouekonoom aan die Universiteit van die Vrystaat, sê die goeie vraag na skaapvleis kan deels toegeskryf word aan die nasionale inperking. Omdat restaurante lank gesluit was, moes verbruikers noodwendig tuis kos maak.
“Die aankoop van rou snitte is bekostigbaarder as klaarbereide kos. Verbruikers kon dus meer bestee aan duurder soorte vleis, soos lam.”
Volgens Maré sal die vraag na veral skaapvleis na verwagting ’n knou kry indien die ekonomie verder verswak.
“Beesvleis, as normale produk, se vraag is redelik bestendig. Wanneer verbruikers swaarkry, word lamsvleis egter maklik met varkvleis vervang as hul tweede rooivleiskeuse.”
UITVOER-TAMELETJIE
Maré sê die tameletjie met die uitvoer van lewende skape na die Midde-Ooste moet ook in berekening gebring word. Die pryssentiment ten opsigte van skaapvleis kan volgens hom op kort termyn geknou word indien die nagenoeg 70 000 skape in Oos-Londen nie uitgevoer kan word nie.
Hy sê die vooruitsig van dié uitvoer het gehelp in die ondersteuning van die pryse. Indien dié besending herbemark moet word vir binnelandse verbruik, kan die prys van slaglammers op kort termyn met ’n paar rand terugsak.
“Hoewel hierdie getal skape net sowat 1% van die jaarlikse slagsyfer van sowat 5 miljoen skape vir die formele mark uitmaak, het die uitvoer van dié skape per skip groot mediabelangstelling ontlok. Dit het die wanopvatting laat ontstaan dat dit ’n oorskot van skaapvleis sal veroorsaak indien die lammers in die binneland bemark moet word.”
Volgens ’n algemene reël in die rooivleisbedryf word ’n bykomende 5 miljoen skape jaarliks in die informele mark verbruik.
Maré ondersteun die siening dat die rooivleisbedryf beskerm moet word, en dat die binnelandse verbruiker van skaapvleis nie vervreem moet word deur ongewenste praktyke nie.
“Suid-Afrika se aansien in die buiteland as uitvoerder van rooivleis kan in die gedrang kom as ons gebrandmerk word as ’n land wat wreedheid teenoor diere ondersteun.”