COVID-19-RNS-ONTTREKKING HOU GROOT BELOFTE IN
’n Plaaslike laboratorium se vermoë om Covid-19-RNS aan afloopriool te onttrek, word gesien as ’n groot stap wat verreikende gevolge vir Suid-Afrika inhou in die land se stryd teen die Covid-19-pandemie.
Dit was die eerste keer in die geskiedenis dat ’n kommersiële laboratorium in Suid-Afrika Covid-19-RNS uit talle rioolafloopmonsters onttrek het.
Dit is uitgevoer as bewys van ’n konsep deur die Nederlandse navorsingsagentskap KWR. KWR het die eerste praktiese demonstrasie gelewer van die doeltreffendheid om afloopwater te monitor om die totale virale lading in ’n gedefinieerde bevolking te bepaal.
Prof. Anthony Turton van die sentrum vir omgewingsbestuur aan die Universiteit van die Vrystaat (UV), sê dit is nou moontlik om die totale virale lading vir elk van die 824 afloopwaterbehandelingsaanlegte in Suid-Afrika te monitor. Sodra die bevolkinggrootte binne die opvangsgebied van die aanleg bepaal is, kan die totale virale lading bereken word met ’n taamlike mate van noukeurigheid. Die noukeurigheid sal ook verbeter namate die tegnologie verder verfyn word. Deur die inligting vir elke monster te vergelyk, sal dit moontlik wees om met redelike noukeurigheid te bepaal of die totale virale lading in ’n gegewe bevolking besig is om toe te neem of af te neem. Wanneer dit op verskillende aflooprioolaanlegte toegepas word, sal dit ook moontlik wees om gebiede met hoër ladings te identifiseer vir die nodige regeringsingryping.
Hoewel die virus deur sure in die maag afgebreek word, sê Turton dat dit steeds moontlik is om die virus se RNS na te spoor.
“Die RNS bestaan uit ‘boublokkies’ en selfs wanneer die virus vernietig is, is dié blokkies steeds teenwoordig. Elke virus het sy unieke vingerafdruk en dit is dié vingerafdruk wat ons dan met akkuraatheid kan naspoor”.
Turton sê die tegniese vermoë kan robuuste inligting na besluitnemers in die regerings én private sektor gee. Intussen sal die UV opleiding verskaf om die tegnologie verder uit te brei.
Dit het slegs agt weke gekos ná die ooreenkoms met KWR om ’n laboratorium te vind met die nodige vermoëns om die eerste toetse te onderneem. Die dringendheid van die Covid-19-pandemie het die vinnige ontplooiing van die tegnologie genoodsaak met die bron van die finansiering die private sektor sodat geen belastingbetalersgeld gebruik is nie.
Die eerste toets was daarop gemik om te bepaal of die Nederlandse metodologie plaaslik herhaal kon word sonder om groot beleggings in opleiding en laboratoriumtoerusting te maak, asook om die logistieke vereis
tes van monsterneming op verskillende aflooprioolplase in een provinsie te bepaal, wat ook die veilige vervoer van die monsters na ’n laboratorium in ’n ander provinsie insluit.
Die monsters is voorberei volgens die strengste vereistes van die protokol en Covid19RNS is op 8 Junie suksesvol onttrek. Die lesse wat uit die eerste proefneming geleer is, sal na die span deurgegee word ter voorbereiding van die volgende monsterneming.
Die tweede monsterneming, wat binnekort sal plaasvind, sal ’n verfyning van die eerste wees, met die lesse wat gedurende die eerste monsterneming geleer is, wat toegepas sal word om die operasie meer stroombelyn te maak en ’n akkurate koste van die diens te skep.
As sameroeper sal Turton in elkeen van die stappe ’n leidende rol speel.
–