Nuwe graanbunker vir die Oos-Kaap
AFGRI Landboudienste, een van Suid-Afrika se voorste landboudienste-ondernemings, het ’n nuwe graanbunker in die Oos-Kaap gebou ter ondersteuning van die plaaslike boeregemeenskap en die regering se visie om die landbou se reikwydte uit te brei.
AFGRI se nuwe bunker naby Butterworth in die OosKaap met ’n opbergingsvermoë van 15 000 ton, bied moderne opbergingsgeriewe vir mielies en sojabone, sê mnr. Jacob de Villiers, uitvoerende hoof van AFGRI Landboudienste.
“Dit is ons eerste kommersiële bunker in dié provinsie en ook die eerste kommersiële opbergingsgerief in die Oos-Kaap. Ons meen dit sal ’n groot verskil maak vir plaaslike boere wat voortaan hul gewasse veilig sal kan opberg sonder om daaroor bekommerd te wees dat produkte verrot voordat dit op die mark kan kom.”
Die bunker op Centane, sowat 30 km buite Butterworth, is een van ses nuwe bunkers wat onlangs deur AFGRI Grain Management geopen is. Die ander is by Delmas, Vaaldrif, Devon, Kortlaagte en die Chelmsforddam.
De Villiers sê AFGRI Grain Management sal die Oos-Kaapse bunker bestuur. Mense uit die plaaslike gemeenskap sal in diens geneem en opgelei word om met die werksaamhede te help.
AFGRI Grain Management sal ook verseker dat graanbestuurstelsels en -prosedures van wêreldgehalte ingestel word. Hulle bied nie net graanopberging nie, maar reik ook silosertifikate uit. Boere kan dit as sekuriteit gebruik om bykomende finansiering te bekom.
Die bunker vorm deel van die Centane/Mbashe-landbou-inisiatief, ’n kommersiële droëlandmielie-en-sojaboononderneming wat 2 500 hektaar kommunale grond in die landelike deel van die Oos-Kaap in ’n enkele kommersiële boerdery-eenheid saamvoeg namens 2 252 kommunale grondeienaars uit 34 dorpies. Die inisiatief is ’n vennootskap tussen hierdie grondeienaars en die bemagtigingsmaatskappy Wiphold.
Me. Gloria Serobe, stigter van Wiphold, sê AFGRI Landboudienste se besluit om in die Oos-Kaap betrokke te raak, is ’n opwindende ontwikkeling vir dié provinsie.
“Die Oos-Kaap is die volgende nuwe terrein vir landbougroei in Suid-Afrika. Die gebied het groot potensiaal as ’n alternatiewe groeistreek vir Suid-Afrika se voedselvoorraad. Basiese infrastruktuur, waaronder graanopbergingsgeriewe, is nodig om landbou-ontwikkeling in die streek te ondersteun. Ons salueer AFGRI dat hy die weg baan en in die toekoms belê, nie net in hierdie streek nie, maar ook in sy besigheid.”
De Villiers sê AFGRI Landboudienste is trots daarop om te help om die grondslag te lê van ’n sterk landboubedryf in die OosKaap. Dit sluit ook ’n tabakboerderyprojek in waarby Lemang Agricultural Services, AFGRI se opleidings- en ontwikkelingafdeling, betrokke is en nou saam met British American Tobacco South Africa werk.
“Dié pogings bewys dat toegewyde ondernemings saam met die regering kan werk om volhoubare vaardigheidsoordrag te verseker, werkgeleenthede te skep en terselfdertyd die landbouwaardeketting kan verbeter.” web:
LIGGING: Patensie
NAAM: The Dragon Fruit Farm
GROOTTE:1600ha (boordis2,5ha)
VERTAKKINGS: Draakvrugte,bye
VELDTIPE: Oos-Kaapse ruigteveld
REËNVAL: 400-450 mm