Diens ouer werktuie makliker met John Deere
Om ’n ouer John Deere-werktuig waarvan die waarborg reeds verval het in ’n puik werkende toestand te hou, is nou makliker en kostedoeltreffender as voorheen danksy ’n generiese onderdele-endienspakket wat onlangs bekend gestel is.
John Deere is bekend daarvoor dat sy tegnologie van wêreldgehalte gerugsteun word deur ’n betroubare nasorgdiens. Die John Deerespan het egter ’n behoefte aan ’n onderdeleoplossing spesifiek vir ouer modelle geïdentifiseer. Die konsep is verder ontwikkel en die eindproduk is die nuwe Service Box wat van vandeesmaand af beskikbaar is.
Die Service Box bied aan boere met ouer modelle in hul vloot meer opsies wat onderdeleoplossings betref.
“In vandag se ekonomiese omstandighede, veral met die swak wisselkoers van die rand teenoor die Amerikaanse dollar, kan boere nie altyd bekostig om hul toerusting gereeld te vervang nie. Hierdie oplossing is spesifiek gerig op toerusting waarvan die waarborg en diensplan reeds verval het,” sê mnr. Jaco Beyers, direkteur van verkope by John Deere se SubSaharaAfrikatak.
Die Service Box bevat ’n voorafverpakte diensstel na gelang van die spesifieke model en ure op die klok. Dit kan by enige John Deerehandelaarstoonbank bestel word. Dus word ’n oorenweer gesoek na alternatiewe diensonderdele uitgeskakel.
“Boere kan die kliëntediens kenmerkend van John Deere se onderdele geniet. Alternatiewe onderdele wat deur John Deere goedgekeur is, word ook aangebied, asook ’n eenjaarwaarborg op die generiese onderdele. Met meer opsies tot hul beskikking kan boere die geskikste en kostedoeltreffendste oplossing vir hul unieke omstandighede kies.
“Verandering in ’n besigheid is ’n teken van groei, en saam met groei ontstaan nuwe behoeftes.
“Ons maak seker ons bly relevant tot die behoeftes van ons boere deur ’n wye keuse aan te bied,” sê Beyers.
DIENSTE EN PRODUKTE
John Deere SubSaharaAfrika het ook ’n aanlyn veldtog van stapel gestuur onder die hutsmerk #partofyourstory om die omvattende diens te beklemtoon wat meer as 300 tegnici in 64 moderne werkwinkels aanbied en bedryf. Die doel is ook om klante bewus te maak van die nuwe reekse generiese onderdele wat beskikbaar is.
“Hierdie onderdele sal ook by ons pakhuis in Kempton Park beskikbaar wees en versprei word deur dieselfde kanale as ons oorspronklike onderdele,” sê me. Hentie Breedt, hoofbestuurder van John Deere se streeksverspreidingsentrum. Dié sentrum handhaaf ’n akkuraatheid van 99,7% vir aflewerings aan handelaars en 99,8% vir die betroubaarheid van voorraad.
Beyers sê die Service Box is ideaal vir ’n plaaslike werktuigkundige wat ouer modelle op die plaas diens. Die nodige onderdele word bymekaar gemaak en in ’n boks verpak.
“Sedert die Service Box aanlyn bemark word, was daar reeds groot belangstelling in die produk. Ons handelaars neem tans bestellings daarvoor. Die Service Box is ons manier om seker te maak ons bly deel van ons boere se suksesverhaal – nie net deur nuwe toerusting en tegnologie van wêreldgehalte nie, maar ook deur hulle te ondersteun met generiese gehalteonderdele wat maklik verkrygbaar is lank nadat die waarborg op toerusting verval het,” sê Beyers.