Covid-19-misdaadvlaag kan vererger
TYDENS vlak vyf en vlak vier van die staat van inperking was daar volgens mnr. Bheki Cele, minister van polisie, ’n groot afname in geweldsmisdaad.
Moordsake het van 27 Maart tot 19 Mei met 63,9% afgeneem teenoor die ooreenstemmende tyd verlede jaar, gewapende roof met 63,6%, ernstige aanrandings met 80,4%, motorkapings met 70,7%, huisrooftogte met 49,1% en die roof van ondernemings met 60,2%.
Twee kriminoloë, dr. Johan Burger van die Instituut vir Sekerheidstudies
en prof. Rudolph Zinn van Unisa se departement van polisiepraktyk, waarsku egter in hul verslag Lifting lockdown: a double-edged sword for public safety? dat Suid-Afrikaners hulle gereed moet maak vir ’n skerp toename in sulke misdade namate inperkingsmaatreëls verslap word.
Hulle sê die perke op mense se beweging, meer polisiepatrollies en padblokkades het waarskynlik bygedra tot die afname in misdaad tydens die streng inperking.
Die verslapping van die maatreëls
op vlak drie het egter ook die deur vir misdadigers oopgemaak, en mediaberigte getuig van ’n skerp toename in gewelddadige aanvalle en rooftogte, veral op die platteland.
NET DIE BEGIN?
Burger waarsku die ekonomiese impak van die Covid-19-pandemie en die staat van inperking gaan nie oornag verbeter nie. Daar gaan weens toenemende werkloosheid en armoede waarskynlik meer misdaad as voor die staat van inperking wees.
Die moord op mnr. Wynand Breedt, ’n musiekonderwyser van Worcester, op ’n plaas buite die dorp op 4 Julie, die moord op ’n swanger vrou op ’n plaas by Weenen en die aanranding en ontvoering van die 82-jarige me. Daleen van der Hoven naby die Lesothogrens was teen druktyd die jongste in ’n vlaag aanvalle (sien
Burger sê daar is ’n wanindruk onder misdadigers dat daar ’n oorvloed rykdom op plase is.
“In hulle oë is daar geld, wawoorde
pens en ander waardevolle dinge om te steel op plase. Vir hulle is plaaswonings ook afgesonder en dus makliker om te beroof.”
In hul verslag sê Zinn en Burger egter daar is hoop, mits Suid-Afrika die lesse wat uit die Covid-19-pandemie geleer kan word, ter harte neem.
“As die pandemie die polisie aanspoor om misdaad met nuwe navorsingsgebaseerde polisiewerk te probeer bekamp, kan Suid-Afrika op lang termyn beter daaraan toe wees.”
Dié benadering beteken dat die polisie voortdurend bewese misdaadbekampingsmetodes (soos alkoholperke, ekstra patrollies en sigbare teenwoordigheid in misdaadbrandpunte) toepas.