Ontken staat slagting?
DIE vae antwoord van pres. Cyril Ramaphosa oor spesifiek waarom daar nie bykomende polisielede ontplooi is gedurende die inperkingstydperk om aanvalle en moorde op plase te voorkom nie, laat dit lyk asof die regering ontken dat hierdie misdade op Suid-Afrikaanse plase plaasvind, sê me. Annette Steyn, die DA se skaduminister van landbou, grondhervorming en landelike ontwikkeling.
Dit kom voor dat daar geen keer aan die wrede plaasaanvalle en -moorde is nie, nie eens in die inperkingstyd waar die hele wêreld pogings aanwend om die Covid-19-pandemie te beveg nie.
Volgens TLU SA was daar in Januarie vanjaar 20 aanvalle en geen moorde op die land se plase, 29 aanvalle en sewe moorde in Februarie, 22 aanvalle en sewe moorde in Maart, 10 aanvalle en een moord in April, en 17 aanvalle en vier moorde in Mei.
ONTPLOOIING
Mnr. Fanie du Toit, VF Plus-LP, het Ramaphosa in die parlement gevra hoekom bykomende wetstoepassers nie ontplooi word om plaasaanvalle en -moorde te voorkom in die lig van die sowat 300 000 mense wat tydens die inperking in hegtenis geneem is vir oortredings van die inperkingsregulasies en die polisie en die weermag ontplooi is om die regulasies af te dwing nie.
Ramaphosa het gesê die “ontplooiing van polisielede is gedoen volgens die misdaadbedreigingsontleding en die misdaadpatroonontleding.
“Die uitkoms van hierdie ontleding rig die ontplooiing van hulpbronne in reaksie op geïdentifiseerde misdaadbedreigings, ongeag die geografiese gebied.”
Hy het gesê die polisie en verskeie belanghebbendes in landelike veiligheid werk saam aan die toepassing van die landelike veiligheidstrategie.
“Die regering is verbind tot ’n misdaadvoorkomingsbenadering wat ’n gelykmatige waarde heg aan die lewe en eiendom van alle Suid-Afrikaners.
“Hy sal voortgaan om wetstoepassers en ander hulpbronne te ontplooi waar dit nodig is.”
Die DA het reeds die speaker, me. Thandi Modise, versoek dat ’n debat van nasionale belang oor plaasmoorde en -aanvalle gehou moet word. Die party het teen druktyd nog vir ’n antwoord van Modise gewag.
BEWUS DAARVAN
Steyn sê dit is nie asof die regering nie ingelig word oor die moorde nie.
Tydens mnr. Bheki Cele, minister van polisie, se termyn as adjunkminister van landbou is gereeld daaroor in parlementêre komiteevergaderings gepraat.
Die DA het onlangs ’n plan bekend gestel teen plaasmoorde, en dr. Ivan Meyer, die Wes-Kaapse minister van landbou, het reeds ’n plan bekend gestel om boere en werkers te beskerm.
Mnr. Pieter Groenewald, leier van die VF Plus, sê dit wil voorkom asof Ramaphosa dit nie kan waag om te vra dat boere teen misdaad beskerm moet word nie, want dan sal hy ook moet vra dat boere se eiendom beskerm word en dit bots met grondonteiening sonder vergoeding.
Wanneer ’n president van ’n land ’n ophef maak van uitsonderlike voorvalle soos die dood van George Floyd in Amerika, maar oor uitsonderlike gruweldade soos plaasmoorde in sy eie land swyg, ontduik hy sy verantwoordelikheid teenoor die burgers van sy eie land, sê Groenewald.