DIÉ WEEK IN DIE LANDBOU
HULP VIR HONGER GESINNE
Die hoenderprodusent Country Bird Holdings het onlangs met die samewerking van die hulporganisasies WeCan en die Atterbury Trust ’n kosskenking gemaak aan 222 hulpbehoewende gesinne verbonde aan die Laerskool Westerlig in Pretoria-Wes. Mnr. Erich Cloete, skoolhoof, sê talle gesinne in die skool se omgewing leef van die hand tot die mond. Vir baie kinders is die etes wat hulle voor die inperking by die skool gekry het, hul enigste maaltyd per dag. Supreme Chicken het 1 ton hoendervleis aan WeCan se voedselhulpprojekte geskenk. Die oorblywende 560 kg sal in WeCan se ander hulpprojekte gebruik word. FOTO: VERSKAF
GEEN PLAN
Die Land Bank het nog geen beleid of plan gereed indien onteiening sonder vergoeding wet word nie, het mnr. Tito Mboweni, minister van finansies, erken in ’n parlementêre vraag van mnr. Noko Masipa, DA-parlementslid. Mboweni het gesê dit sou voortydig wees om enige sulke stappe te formuleer terwyl die parlement se werk aan die onteieningswetsontwerp nog nie afgehandel is nie. Hy het daarop gewys indien onteiening sonder vergoeding wet word, die Land Bank dadelik R9 miljard aan
sy finansiers sal moet terugbetaal. Indien hy dit nie kan doen nie, sal ’n klousule in werking tree wat meebring dat die bank se finansieringsportefeulje (lenings aan boere) van R41 miljard onmiddellik betaalbaar is.
OP DIE ROOI TAPYT
Die Ingonyama-trustraad moet maandeliks aan die departement van landbou, grondhervorming en landelike ontwikkeling verslag doen oor sy besteding. Me. Thoko Didiza, minister van landbou, grondhervorming en landelike ontwikkeling, het dié verpligting ingestel as deel van ’n ooreenkoms met die trust sodat sy staatstoelae van R22 miljoen uitbetaal kan word. Die parlementêre portefeuljekomitee vir landbou, grondhervorming en landelike ontwikkeling het aanbeveel dat Didiza die toelae terughou totdat die trust die nodige begrotingsdokumente indien wat sy stigtingsdoel weerspieël. Dié aanbeveling volg ná die trust geweier het om hom aan oorsig te onderwerp. Mnr. Mdu Shabane, direkteur-generaal vir die departement van landbou, sê slegs ’n gedeelte van die toelae sal oorbetaal word. Wanneer die trust rekenskap gegee het van die besteding daarvan, sal die res oorbetaal word.
KOOPBESLISSING KOM
’n Derdeparty-mening oor of die verkoop van Tongaat Hulett se styselafdeling aan Barloworld kan voortgaan of nie, sal in September gefinaliseer wees, berig Business Day. Barloworld wil hom onttrek aan dié transaksie van R5,3 miljard. Hy beroep hom, op grond van die Covid-19-pandemie, op ’n klousule in die koopkontrak dat daar ’n materiële verandering binne die besigheid plaasgevind het wat die transaksiewaarde raak. Ten einde die dispuut by te lê, is ’n derde party aangestel om te bepaal of Covid-19 werklik ’n materiële verandering in die besigheid verteenwoordig. Die beslissing sal rondom 21 September gereed wees, sê Barloworld.
SLOERDERY
Tiger Brands word daarvan beskuldig dat hy ’n groepsgeding wat verband hou met die listeriose-uitbreking in 2017 en 2018 vertraag. Business Times berig die regspan wat die nagenoeg 700 eisers verteenwoordig, het ’n aansoek by die hooggeregshof ingedien om die maatskappy te dwing om dokumente waarop hy sy verweer baseer, teen einde Mei te oorhandig. Tiger Brands ontken dat hy sy voete sleep en sê Covid-19 het sy werk in dié verband vertraag. Mnr. Richard Spoor, prokureur van die eisers, sê van die eisers is vroue wat miskrame gehad het, kinders wat neurologiese skade opgedoen en bejaardes wie se psigiatriese toestand weens die siekte vererger het. Vertragings in die regsproses plaas bykomende druk op hulle.
DEURSLAGGEWEND
Gunstige koringproduksietoestande heers tans in die suidweste van Australië, veral in Nieu-Suid-Wallis. Selfs in Queensland, waar toestande minder gunstig is, is grondvogvlakke hoër as die afgelope paar seisoene. Mnr. Johan van den Berg, onafhanklike landbouweerkundige, sê ’n goeie Australiese koringoes is dikwels ’n aanduiding van gunstige somerproduksietoestande in Suid-Afrika. Intussen sal weerstoestande in Amerika die komende weke deurslaggewend wees vir dié land se mielieoes, en dus ook internasionale mieliepryse. Tans word 73% van die aanplantings as goed tot baie goed geklassifiseer, sê dr. Werner Rossouw, direkteur van Silostrat. Min reën het egter oor die noordwestelike dele van die mieliestreek voorgekom.