SETA-ROMPSLOMP SIT LANGER OPLEIDING STOP
MEER as 300 plaaswerker-studente in die Witzenberg-munisipaliteit kan nie vanjaar hul beoogde onderrig ontvang nie omdat AgriSeta sy finansiering van die Koue Bokkeveld-opleidingsentrum vir die boekjaar 2020-’21 onttrek het. Dié finansiering beloop R3 miljoen per jaar.
Volgens me. Joy van Biljon, uittredende uitvoerende hoof van die sentrum, is die verlies die gevolg van tegniese aspekte in die AgriSeta se evaluering van hoe instellings wat geld ontvang, die geld bestuur.
“Dit is regtig hartseer, want ons gebruik die AgriSeta-finansiering om die gevorderder, duurder kursusse aan te bied. Dit is die junior bestuurders en produksiebestuurders op die plase wat nie verder onderrig kan ontvang nie.”
Dit is die tweede jaar agtereenvolgens dat AgriSeta geld aan die sentrum weier omdat AgriSeta meen die sentrum het onbestede AgriSeta-geld.
MINAG WERKLIKHEID
Me. Carmen Roberts, bedryfsbestuurder van die sentrum, sê sy het nie ’n probleem met die AgriSeta se stelsel nie, maar eerder die wyse waarop dit toegepas word.
“Ek dink dit word soms sonder die inagneming van die werklikhede op grondvlak toegepas.”
Die sentrum probeer die afgelope twee jaar aan AgriSeta verduidelik wat hy as onbestede geld beskou, het ontstaan nadat die sentrum ’n addendum tot bewyse van besteding van die AgriSeta aangevra het.
“Ons NQF-vlak 4-kursusse duur 24 maande, terwyl AgriSeta twee jaar gelede aangekondig het dat finansiering slegs vir 12 maande geldig is en dat instellings wat nie geld in hierdie tydperk kan bestee nie, nie weer finansiering sal ontvang nie. Dit het meerjarige kursusse skielik onmoontlik gemaak.”
Roberts sê AgriSeta-klerke het geweier om hulle tegemoet te kom. Hulle het aangevoer dat dit ’n raadsbesluit was en hulle niks daaraan kan doen nie.
BOERE DRA MEESTE BY
Die gevolge van die situasie kring uit na die werknemers wat hulself deur opleiding wil bemagtig om bevordering in hul werkplek te bewerkstellig.
“Die gebrek aan hierdie onderrig plaas ’n plafon op vordering en bevordering van die werknemers op bestuursvlak. Daar kom dus geen nuwe geleenthede op hierdie posvlak nie omdat hierdie werknemers nie bevordering kry nie.
“Jonger werknemers se geleentheid op bevordering tot bestuursvlakke word dus eweneens belemmer,” sê Van Biljon.
Vir Roberts is dit ’n groot teleurstelling, want indiensneming in die Witzenberg-streek groei jaarliks. Daarmee saam kom nuwe geleenthede op bestuursvlak wat nou deur mense van elders gevul moet word.
Gelukkig beloop AgriSeta se
R3 miljoen-toewysing net sowat ’n derde van die sentrum se algehele omset. Plaaslike boere dra die meeste van die koste.
Die meer as R6 miljoen wat boere jaarliks belê in die opleiding van heeltydse én tydelike werknemers in die streek finansier jaarliks vir meer as 7 500 kursusgangers tegniese onderrig, soos snoei- en besproeiingskursusse, asook lewensvaardigheidskursusse, soos konflikhantering en persoonlike begrotings- en finansiële beplanning.
Die sentrum het Agri WesKaap genader om hulp om die situasie te probeer beredder.
AgriSeta het teen druktyd nie op versoeke om kommentaar gereageer nie.