Nuwe verbod is ’n ramp
DIE wynbedryf, wat reeds sukkel om kop bo water te hou, steier voor die regering se drakoniese inperkingsreëls.
Pres. Cyril Ramaphosa het op Sondagaand 12 Julie alle plaaslike drankverkope onmiddellik opgeskort. Dit volg ná die bedryf vir sowat 10 weke lank nie in die plaaslike mark kon handel dryf nie. Drankverkope is eers weer vanaf 1 Junie toegelaat, maar geen verkope by kroeë, restaurante of hotelle nie.
Volgens Ramaphosa het alkoholverwante probleme toegeneem sedert drank weer beskikbaar was, wat die las op hospitale vererger het. ’n Aandklokreël (van 21:00 tot 04:00) is ingestel omdat die meeste voorvalle glo saans plaasvind. Tog meen kenners die regering het nie die aanvanklike inperkingstyd genoeg gebruik om gesondheidsdienste in die land gereed te kry nie.
Dit word ook wyd aanvaar dat smokkelhandel van alkoholprodukte nou skerp sal styg.
Mnr. Mandla Patson, streeksverkoopsbestuurder by Spier Wyne, het getwiet: “My vierjari
ge seun het my gevra wat ek nou gaan verkoop en waar ek gaan werk? ’n Vierjarige verstaan die impak van hierdie verbod”.
Ook dr. Ivan Meyer, Wes-Kaapse minister van landbou, het hom tot Twitter gewend. “Ek is diep bekommerd oor die wynbedryf wat wéér gestraf word deur ’n onbevoegde staat. Hierdie is baie sleg vir die wynbedryf en sal duisende werkgeleenthede vernietig.”
Mnr. Johann de Wet, hoofbeampte van De Wetshof-wynlandgoed, beskou dit as ’n ramp vir die bedryf. Hy meen talle wynkelders en restaurante sal dit nie oorleef nie. “Dit is nie net kelders nie, maar ook werkers, verspreiders en restaurante wat gaan swaarkry. Dit is ’n lang lyn mense wat geraak word.”
Mnr. Hein Koegelenberg, hoofbestuurder van La Motte, sê diensverskaffers aan die bedryf word ook swaar getref.
“Die regering verstaan nie die omvang nie en ek dink nie hy besef wat hy besig is om te doen nie. Daar gaan talle ondernemings wees wat net nie weer sal kan oopmaak nie.”
Hy het ook verwys na onwettige handel en die regering se onvermoë om dit te beheer.
De Wet sê die probleme in die Kaapstadse hawe belemmer ook die bedryf se buitelandse bemarkingsgeleenthede.