Afrika Droughtmasters presteer ondanks droogte
Die Afrika Droughtmaster het hom oor en oor bewys in die Kalahari in die suidooste van Namibië. Met ondergemiddelde reënval en ’n rekorddroogte het die koeie van ’n boer in dié gebied steeds ’n dragtigheid van 92% gehad.
Mnr. Danie Visser en sy vrou, Desirée, boer op die plaas Witpan in die Aranosomgewing in die suidooste van Namibië. Hulle kry gewoonlik 200300 mm reën per jaar.
Die eerste bul en 19 dragtige verse van die Consideratastoetery in Vryburg in Noordwes het in 2014 op Witpan aangekom. Die kudde bestaan tans uit 150 vroulike diere. Die Consideratakudde is ook die grondslagkudde vir die Afrika Droughtmaster in SuidAfrika en Namibië.
“Ek het nie destyds geweet wat die impak van die Afrika Droughtmasterbeeste op my boerdery en weiding sou wees nie. Ons teelbeleid is om mediumraam, vroegryp beeste te teel wat aangepas is. Die diere moet lae insetkoste verg, maar steeds goed presteer. Ons is nie toegespits op maksimum produksie per hektaar nie, maar wel maksimum wins per hektaar. Om te oorleef, moet ons koste verminder en met aangepaste, funksionele diere boer wat ’n goeie kondisietelling handhaaf. Die koeie moet elke jaar ’n kalf speen, goed grootmaak en weer herbeset raak.”
Visser sê hulle het in die afgelope sewe jaar ondergemiddelde reën gekry en hul reserwes het veral in 2018 en 2019 begin opraak. Verlede jaar was ’n rekorddroogtejaar, maar sy koeie het steeds ’n dragtigheid van 92% gehad.
“Die beeste het geen voer gekry nie, maar net ’n produksielek. Ons het later nie meer geweet waarvan die diere lewe nie, want dit het soos ’n woestyn gelyk hier. Die beeste het egter hul naam gestand gedoen en die droogtetoets geslaag. Ek glo hierdie beeste kan ’n groot rol in Afrika se beeskuddes speel,” sê Visser.
VOORDELIGE BEESRAS
Die Afrika Droughtmaster het talle voordele, waarvan veelsydigheid een is. “Die koeie produseer goeie speenkalwers, het goeie melk en mooi uiers en spene. Hulle is goeie moeders en handhaaf ’n goeie koeitotkalfdoeltreffendheid. Kalwers speen gemaklik 50% van die koei se gewig met speentyd. In normale jare speen bul en verskalwers op vyf en ’n half tot sewe en ’n half maande teen gemiddeld 240 kg.”
Visser sê osse groei goed en rond goed af in voerkrale en op die veld. Die kalwers is klein met geboorte, maar is lewenskragtig en groei vinnig.
Die Afrika Droughtmasterbeeste het ook ’n goeie temperament. ’n Gedeelte van die Consideratakudde is poenskopdiere, wat bydra tot minder insetkoste.
Die Afrika Droughtmaster het besonderse erfdwang en hul nageslag presteer goed in kruisteelprogramme. Vroulike DroughtmasterF1diere is gesog danksy hoë vrugbaarheid en moedereienskappe.
“Daar is nie ’n wonderbees nie, maar die Considerata Droughtmasterstoetery het beslis besonderse beeste geteel wat ekonomies sin maak en goed aangepas is in die ekstensiewe dele van SuiderAfrika. Die beeste lewer ’n gehaltespeenkalf met die minimum insetkoste. Die Afrika Droughtmasters het my beïndruk omdat hulle beter presteer as enige ander ras waarmee ek al geboer het. In die huidige droogtetoestande het hulle ’n aansienlike verskil gemaak aan my boerdery se wins. Dit is ’n groot voorreg om met hulle te kan boer,” sê Visser.
VERBETER WEIDING
Visser sê die enigste manier waarop kommersiële boere kan oorleef, is om met aangepaste beeste te boer, produksiemiddele te beperk en weiding te verbeter.
“Ons het ’n paar jaar terug begin met hoëdrukbeweiding. Groter troppe bewei ’n kamp vir korter periodes waarna die kamp ’n lang rusperiode kry.”
Mnr. Johann Zietsman van Zambië het hulle gehelp met ’n weidingsplan waarin skape en beeste suksesvol inpas by die weidingsbestuur. Ná ’n goeie reënseisoen in 2020 is Visser verstom hoe vinnig die weiding herstel het ná die afgelope sewe jaar se ondergemiddelde reën.
“Ons skryf dit toe aan goeie reën, hoëdrukbeweiding en lang rusperiodes. Die beeste is aangepas om ’n groot verskeidenheid gras en bosse doeltreffend te benut en dit in vleis om te skakel en dus wins te verhoog. Ons boer in ’n oorwegende skaapwêreld, maar die Afrika Droughtmasters floreer in die Kalahari. Dit is amper onmoontlik om weiding sonder beeste te verbeter en daarvoor het ons aangepaste diere, soos die Afrika Droughtmaster, nodig.”
Visser verkoop elke jaar van September af bulle van die plaas af. Bulle word in die veld afgerond indien nodig.