Wat broei by SA Jagters?

WAT gaan agter die skerms by die SA Jagters- en Wildbewaringsvereniging aan? Dit was Manie se eerste gewaarwording toe hy verneem hoe die skote die afgelope tyd tussen raadslede geklap het.

Carl Arnold, voorsitter (of president, soos hulle graag genoem wil word), en Danie de Villiers, ondervoorsitter, het kort ná mekaar uit hul poste bedank. Hulle is op ’n raadsvergadering met onderskeidelik Basie Bergh, veeboer van Kroonstad, en André van Heerden, sakeman van Welkom, in ’n waarnemende hoedanigheid vervang tot die jaarkongres in November gehou word.

Manie se ore het nóg meer gespits toe hy van een van sy kollegas verneem die vereniging het hom gevra om nie oor die aanwysing van die tydelike voorsitter en ondervoorsitter te berig nie, omdat “daar dinge agter die skerms gebeur”.

Die vereniging wou weet waar Landbouweekblad die inligting gekry het, want dit is net vir lede se kennisname bedoel. Die vereniging sal glo wel later ’n mediaverklaring uitreik.

Manie het ’n bietjie gaan rondkrap en afgekom op die redes vir die bedankings. Daar was blykbaar heelwat woordewisselings tussen raadslede.

Manie verneem die voorsitter voer aan hy het selfs ’n anonieme dreig-selfoonboodskap ontvang dat hy moet bedank, anders hardloop die anonieme persoon media toe met “die storie”. Arnold beskou dit glo as “afpersing”.

Daar was glo ’n raadsvergadering waar die ou voorsitter nie by was nie, waar ’n opname onder raadslede en bestuurders gedoen is, waarvan die uitslag as ’n gebrek aan vertroue in sy leierskap vertolk is. Van sy kant af slinger die uittredende voorsitter beskuldigings rond van onreëlmatighede, ’n magstryd en ’n heksejag.

Die skote het skynbaar eers die laaste maand of wat van 2020 begin klap. Die uiteinde was dat die raad vir Arnold skriftelik gevra het om te bedank, wat hy toe, skynbaar onder protes, wel gedoen het. Die waarnemende voorsitter en sy adjunk is kort daarna aangewys.

Sulke dinge is nie goed vir die wild- en jagbedryf nie, veral nie nou dat wildboere so steier onder Covid-19 se aanslag, die gepaardgaande totale afwesigheid van buitelandse jagters en die sukkelende ekonomie wat menige biltongjagter dwing om vir eers van sy biltonglus te vergeet.

Manie hoop van harte die leierskorps gaan hul geskille (indien daar nog ontevredenheid is) spoedig oplos sodat hierdie waardevolle bedryf in almal se belang kan vooruit boer.

CELE MOET OPLOSSING VIND VIR WAPENAMNESTIE

Die tronke is reeds propvol en met die Covid-19-pandemie wat beperkte bewegings meegebring het én die polisie wat nie oor genoeg kapasiteit beskik om vuurwapenlisensies te hernu nie, sal Bheki Cele, minister van polisie, ’n werkbare oplossing moet vind.

Hy kan tog nie die meer as 200 000 burgers wat sonder ’n vuurwapenlisensie sit, in die

tronk gaan gooi nie. Verlede jaar moes Cele die parlement vra om ’n nuwe amnestieperiode vir ses maande goed te keur – van 1 Augustus 2020 tot 31 Januarie 2021 – omdat die vorige een, wat in Mei 2020 geëindig het, nie die gewenste resultate gelewer het nie.

Dit was omdat die inperking weens die pandemie om middernag op Donderdag 26 Maart 2020 begin het.

Die tweede amnestieperiode was duidelik ook nie voldoende nie. Wat staan Cele nou te doen? Siende dat amnestieperiodes nie verleng kan word nie, kan hy weer ’n versoek by die parlement indien dat nóg ’n vuurwapenamnestieperiode toegelaat word.

Manie dink hierdie is die beste oplossing om te verseker dat mense hul lisensies kan hernu en ook dat onwettige vuurwapens en ammunisie nog ingehandig kan word.

VEGANISTE GAAN NIE HIERVAN HOU

áltyd beter as vars melk.

In antwoord op die advertensie se wekroep dat tieners hul ouers moet “help”, bied Tom dan aan om vir Oatly te help. Hy verduidelik die wêreld se derde grootste koolstofopbergplek is die grond, en die diepste, rykste koolstofstoorplekke is nie die dun lae arm grond in die reënwoude nie, maar die ryk grasvelde, wat oor millennia deur veral groot herbivore gevorm is.

Farmer Tom sê in Oatly se wêreld is die monokultuur van ’n hawerland altyd beter as die diversiteit van ’n weiveld. By-onvriendelike, selfbestuiwende hawer is altyd beter as ’n blomryke weiveld. Ploegpraktyke wat koolstof in die atmosfeer vrylaat, is altyd beter as die koolstofneerlegging van ’n goed-bestuurde grasveld. ’n Eentonige hawerland sonder heinings of bome is altyd beter as die diverse habitat van ’n weiveld. ’n Produksieproses wat kunsmis en insekdoder gebruik, geniet voorkeur bo lae-insetgrasvelde. Dit is glo beter om kunsmatige melk in ’n nywerheidsproses saam te stel met kalsium uit Amerika, hawer uit Swede en vitamiene uit China, pleks van om melk by ’n winkel om die draai te koop, van ’n koei wat waarskynlik nooit die plaas verlaat het nie.

Manie kan nie genoeg met Farmer Tom saamstem nie. Hy wonder egter of die tieners op wie sy video gemik is, die aandagspan gaan hê om na vyf minute van sy wel beredeneerde standpunte teluister.

BRANDERPLANKRY EN WYN

Die verbod op wynverkope en strandbesoeke was ’n dubbele terugslag vir die Kaap se branderplankryende wynmakers. Verbeel jou dus die vreugde toe die verbod op albei op 1 Februarie opgehef is. Minute nadat pres. Cyril Ramaphosa aangekondig het dat die alkohol- en strandverbod opgehef is, twiet Johan Reyneke, branderplankryer, biodinamiese boer en wynmaker van Stellenbosch: “Nou kan ek van Maandag tot Donderdag wyn verkoop en van Vrydag tot Sondag branderplank ry.”