SÓ KAN BETERKATOEN-INISIATIEF SA UITVOER HELP
DIE katoenmark tel kop op nadat die bedryf wêreldwyd in 2020 ’n moeilike jaar beleef het weens die Covid-19-pandemie. Saam met inentingsveldtogte wat reeds in die meeste ontwikkelde lande begin het, het die internasionale verwysingsprys vir katoen herstel van omtrent 65 Amerikaanse sent per pond (R9,78 per 435 g) in die ooreenstemmende tydperk verlede jaar tot 80-85 Amerikaanse sent per pond (R12,03 tot R12,79 per 435 g) tans.
Saam met die gunstige wisselkoers is dit goeie nuus vir Suid-Afrikaanse uitvoerders, sê mnr. Hennie Bruwer, uitvoerende hoof van Katoen SA. Boonop is Suid-Afrika se produsente goed geposisioneer om by veral Europese verbruikers voordeel te trek uit sy goeie produksiepraktyke.
In ’n onlangse ontleding van die katoenbedryf sê Nedbank katoen wat aan die beterkatoeninisiatief (BCI) voldoen, sal saam met die Green Deal-inisiatief wat ekonomiese herstel in Europa aandryf, al hoe belangriker in die Europese mark word.
GROOT GEDEELTE
Terwyl 44% van die katoen wat die afgelope seisoen in Suid-Afrika geoes is, aan die BCI voldoen, voldoen gemiddeld net 22% van katoen wêreldwyd daaraan. Katoen SA is die BCI-toepassingsvennoot in Suid-Afrika, wat die proses aandryf om alle Suid-Afrikaanse katoen binne die volgende drie tot vyf jaar aan die BCI te laat voldoen.
Bruwer sê die voordeel van BCI-katoen vir produsente wat wil uitvoer, is dat dit eerste op die internasionale mark opgeraap word. Katoen wat nie aan BCI-standaarde voldoen nie, sal ook verkoop, maar BCI-katoen verkoop eerste.
Volgens Bruwer is dit duur om aan enige sertifiseringliggaam te behoort en veroorsaak dit ekstra werk en administrasie vir produsente. Daarom het Katoen SA die BCI gekies. Dié inisiatief staan neutraal teenoor GM-tegnologie, iets waarop die Suid-Afrikaanse katoenbedryf swaar steun. Katoen SA het in sy soeke na ’n registrasieliggaam gesien Suid-Afrikaanse produsente wat aan die verskillende wette rakende arbeid, omgewingsake, water en die bestuur van ander hulpbronne voldoen, byna reeds aan al die BCI-vereistes voldoen het. “Ons was feitlik klaar daar. Dit was dus nie ’n groot sprong om by die inisiatief se standaarde in te val nie.”
Bruwer noem dat die BCI ook plaaslik vir produsente ’n voordeel inhou. Woolworths koop byvoorbeeld slegs katoenprodukte wat organies gesertifiseer is of aan BCI-standaarde voldoen.
–