Vinpro volhard met hofsaak teen landwye alkoholverbod
DIE bedryfsliggaam Vinpro gaan voort met die hofaansoek wat op 27 Januarie by die Wes-Kaapse hooggeregshof ingedien is en waarin versoek word dat die Wes-Kaapse premier die gesag gegee word om die verkoop van drank te beheer.
Uiteindelik sal versoek word dat dié gesag aan alle provinsiale regerings gegee moet word.
Hoewel die verkoop van drank weer gedeeltelik toegelaat word, wil Vinpro met die regstappe verseker dat die bedryf nie weer “soos ’n ligskakelaar aan- en afgeskakel word nie”, sê mnr. Rico Basson, Vinpro se bestuurshoof.
Die liggaam het egter afgesien van ’n aansoek om ’n tussentydse interdik, omdat pres. Cyril Ramaphosa vroeg vandeesmaand aangekondig het dat drank van Maandag tot Donderdag van 10:00 tot 18:00 verkoop mag word.
Belastingvrye winkels, geregistreerde wynkelders, wynplase, mikrobrouerye en mikrodistilleerders sal alkohol vir wegneemdoeleindes tydens hul normale lisensie-ure kan verkoop.
20WEKE
Die drankverbod wat weens Covid-19-regulasies ingestel
is, het tot gevolg gehad dat die wynbedryf sedert Maart 2020 vir 20 weke nie volledig kon handel dryf nie en verliese van R8 miljard gely het. Die situasie bedreig dus steeds die wynbedryf se waardeketting.
Basson sê dit is ’n verligting vir die bedryf dat die verkoop van drank weer toegelaat word, maar dat ’n moeilike herstelpad vir wynverwante besighede voorlê. Die aankondiging het te laat vir van dié besighede gekom.
“Ons sal aanhou om die regering vir finansiële verligting te vra ten einde die voortbestaan van ons 533 wynkelders, 2 778 wyndruifprodusente en 269 000 werknemers in die wynbedryf se waardeketting te beskerm.”
VERANTWOORDELIK
Dr. Ivan Meyer, Wes-Kaapse minister van landbou, sê die opheffing
van die drankverbod sal die wynbedryf in staat stel om die wesenlike verliese aan inkomste en werkgeleenthede gedurende die afgelope tien maande te verhaal.
“Ek vra die bedryf om dit op ’n verantwoordelike wyse te doen aangesien ons nie nog ’n inperking kan bekostig nie.
“Plekke waar drank verkoop word, moet groter verantwoordelikheid vir hul kliënte neem en help om die nadelige gevolge van drankmisbruik, wat tot ’n toename in traumagevalle lei, te bestuur.”
Suid-Afrikaanse Brouerye het middel-Januarie ook regstappe teen die verbod gebring, en Heineken SA het aangekondig dat hy poste gaan besnoei weens die inkomsteverliese wat die verbod teweeggebring het.
–