NAT WEER, MIN SONSKYN KASTY GRONDBOONTJIES
GRONDBOONTJIEBOERE in Noordwes sukkel tans met blaarvlek en blaarvoeding weens die swaar reën en min sonskyn van die afgelope paar weke.
Boonop maak die nat toestande dit vir hulle moeilik om die nodige chemiese bespuitings te kan doen, wat ’n belowende oes kan benadeel.
“In die 2019-seisoen is min grondbone geplant weens te min reën in planttyd. Die opbrengste van die aanplantings was ook minder as gevolg van lae reënval,” sê mnr. Lourens de Kock, besturende direkteur van die grondboontjiekoper Roba Foods, en self ’n grondboontjieboer. “In die 2020-seisoen het produsente goeie oeste gehad, maar in sommige gebiede moes hulle aanplantings vroëer uithaal weens vroëe ryp.”
In die huidige seisoen kon boere danksy goeie reën in November 80% van hul aanplantings in dié maand afhandel, pleks van Desember soos die afgelope vyf jaar die geval was weens laat reën. Bogemiddelde reën en bewolkte dae verhoog egter nou die risiko vir blaarvlek.
Altesaam 60% van Suid-Afrika se totale grondboontjieopbrengs het verlede jaar uit Noordwes gekom.
SONSKYN BELANGRIK
Mnr. Kierie Barnard, ’n Midchem-verteenwoordiger verbonde aan die Noordwes-koöperasie, sê sonskyn is belangrik vir goeie ontwikkeling by grondboontjieplante omdat die plante dig teen mekaar groei en daar min lugvloei is. “Te veel reën veroorsaak dat die grond verdig en dan is daar nie genoeg suurstof in die grond nie. Dit gee aanleiding tot geel blare wat sleg vir peulontwikkeling onder die grond is. Goeie grondboontjies het gesonde blare nodig.”
Grondboontjies moet vir optimale opbrengs sowat vyf maande in die grond bly.
Volgens De Kock moet plante
Barnard sê daar is ’n toename in bespuitings die afgelope paar weke weens blaarvlek en swamsiektes. Baie blaarvoeding word ook gespuit sodat plante langer in die grond kan bly en optimaal ontwikkel.
“In die verlede het die meeste boere korrektief bespuit, maar omdat ons nou meer reën kry, is daar ook voorkomend bespuit. Boere moet oral dié seisoen ’n ekstra spuitsessie inwerk.”
Boere spuit veral nou blaarvoeding wat kombinasies van swael, magnesium en seewier bevat. Dit help met die stresverligting van grondboontjieplante en stimuleer haarwortelontwikkeling.