BELOWENDE SEISOEN WINK VIR TAFELDRUIWE
TOT 7 500 kartonhouers Tawnytafeldruiwe per hektaar kan vanjaar onder nette in die omgewing van Worcester en Rawsonville geoes word.
Consortium Fruit, ’n maatskappy wat tafeldruiwe onder nette verbou, het vanjaar van die heel vroegste tafeldruiwe in die Wes-Kaap geproduseer. Die eerste Tawny-tafeldruiwe is reeds in die eerste week van die jaar vanaf Gouda na die Europese Unie en Brittanje uitgevoer.
“Die reën wat vroeg in Januarie in verskeie gebiede skade aangerig het, het nie by ons uitgesak nie en dit word weerspieël in die gehalte,” sê mnr. Charles Jordan, uitvoerende hoof van Consortium Fruit. “Ons het egter ongewoon hoë druk van witroes en donsskimmel in Oktober en November beleef weens laat reën en hoë humiditeit. Die nette het baie voordele, maar in hierdie geval is dit ’n nadeel, want die humiditeit is hoër onder die nette en die natuurlike predatore minder.”
GELYKSPEEL
Teen 27 Januarie het Consortium Fruit reeds 50% van die oes ingesamel. Sowat 60% van die Tawny-druiwe was reeds geoes.
“Die gehalte is vanjaar baie goed. Ons het effe skade weens voëls en die kleur kom effens stadiger, maar die houvermoë is baie goed danksy die goeie toestande. Met die Tawny is ons tans op sowat 6 000 kartonhouers (die 4,5 kg-ekwivalent) per hektaar. Ons skat ons gaan by 7 500 kartonhouers per hektaar uitkom en ons gelykspeelvolume is rondom 4 000 kartonhouers, na gelang van die prys.
“Ons betalingtydlyn is sowat 13 weke. Daar kan dus nog baie gebeur, maar ons is versigtig optimisties dat ons verlede jaar se prys plus inflasie sal kan ewenaar, wat beteken dat ons ’n geseënde jaar sal hê.”
SKEEPSVERKEER
Daar is egter reeds ’n effense terugslag wat die prys tydelik nadelig kan beïnvloed, sê mnr. Jacques Beukes, mede-eienaar van Modderdrift in die Hexriviervallei. “(In die laaste week van Januarie) het dit nog goed gegaan, maar (die eerste week van Februarie) gaan daar heelwat skepe gelyktydig in die Europese hawens aankom. Dit is weens logistieke probleme, onder meer wind en Covid-verwante vertragings.
“Die druiwe wat nou daar aanland, kom ook meestal uit gebiede wat in Januarie reën gehad het. Die houvermoë is effe swakker as normaal. Die skielike groot volume en swakker gehalte sal beslis op kort termyn druk op die prys plaas,” sê hy.
Hy is bekommerd oor skielike onsekerheid in Verre-Oosterse markte ná gerugte dat ’n kartonhouer kersies uit Suid-Amerika blykbaar in China positief getoets het vir Covid-19.
“Indien hierdie kwessie uitgesorteer word, die ooraanbod in Europa weggewerk word en die weer aan ons kant hou, behoort ons ’n baie voorspoedige seisoen te hê, want gehalte en produksie lyk goed.”