Moeilikejaarstuitnie Wes-Kaapsegraanoes
IOndanks Covid-19-inperkingsmaatreëls en die gepaardgaande ontwrigting en onsekerheid, het boere in die wintergraangebiede van Suid-Afrika met hul dagtake voortgegaan en aangeplant om voedselsekerheid te help verseker.
n Augustus en September verlede jaar het graangebiede in die Wes-Kaap tydige reën gekry, terwyl temperature laag was. Dit het tot die goeie produksie van kanola, gars en koring deur die hele streek bygedra. Die Swartland het in 2020 ’n gemiddelde tot bogemiddelde oes gehad, wat stof tot dankbaarheid is ná 2019 se totale misoes. Die gesegde rain makes grain was voorwaar dié seisoen van toepassing. Koring- en garsopbrengste van tot 5 t/ha is in sekere gebiede aangeteken.
Kanola het ook uitstekend presteer met rekordoeste in die hele Wes-Kaap.
AFGRI Graanbemarking, wat namens AB InBev as fasiliteerder optree, se moutgarsmandaat vir die Swartland het goeie innames aangeteken.
Sowat 38 000 metrieke ton gars van uitsonderlike gehalte is gelewer. Die gemiddelde opbrengs oor die hele mandaatgebied was 2,8 ton per hektaar.
Dié mandaatgebied strek van Eendekuil tot Philadelphia en van Tulbagh tot Hopefield. In die vorige seisoen het 86 produsente 13 400 ha gars verbou.
Ondanks struikelblokke in die 2020-oesjaar, was dit eintlik ’n geseënde seisoen. AFGRI Graanhantering het by sy vier innamepunte in die Swartland – Malansdam-, Klipfontein-, Eensgezindten Eenboom-bunker – meer as 115 000 metrieke ton graan ingeneem. AFGRI en sy boere is baie dankbaar. ’n Rekordvolume van 2 941 metrieke ton graan per dag is met sowat 145 vragte by die Eenboom-bunker ingeneem.
Pryse was ook gunstig in die bemarkingsjaar en dit het bygedra tot winsgewendheid.
Sedert 2019 het die koringprys goed presteer en kon produsente deur middel van goeie verskansing ’n goeie gemiddelde Safex-prys realiseer. AFGRI Graanbemarking staan sy boere by met verskeie strategieë vir die beskerming teen risiko’s, veral wat gars en koring as hoofkommoditeite betref.
Hoewel die Safex-prys vir Desember 2020 in die oestyd taamlik gedaal het tot vlakke van R4 600 per metrieke ton, het dit regdeur die seisoen ’n goeie geleentheid vir optimale bemarking gebied. Prysvlakke van R4 850 tot R5 120 per metrieke ton is behaal.
Hoewel die Wes-Kaap ’n goeie oes gehad het, moet produsente in die komende seisoen die markte fyn dophou om ingeligte besluite te neem oor die verkoop en verskansing van hul graan. AFGRI Graanbemarking staan gereed om raad en hulp te gee om boere in staat te stel om te boer.