Reproduksiebestuur kan skaapboerdery maak of breek
As die eerste wet van presisieskaapboerdery is om jou veld volgens sy dravermoë te belaai, is die tweede wet om ’n teelkudde te hê wat in die spesifieke omgewingstoestande maklik en gereeld beset raak, hul dragtigheidstermyn suksesvol voltooi, maklik lam, gesonde lammers het en hul lammers suksesvol grootmaak tot speentyd.
BESETTING
Die eerste hekkie om te oorkom vir reproduksiesukses is om die ooie met soveel fetusse moontlik beset te kry. Dit kan hol klink, maar hoe meer ooie oorslaan en hoe minder meerlinge hulle dra, hoe laer is die kudde se uiteindelike ooiproduktiwiteit.
Daar is ’n paar praktyke wat goed werk om ooie te stimuleer om op hitte te kom en meer ryp eiers af te skei. Een daarvan is om die ooie in ’n groeiende liggaamskondisie te hê wanneer die ramme bykom. Die proses moet reeds sowat drie weke voor paartyd begin. Dit is veral belangrik vir ’n lenteparing.
Goedkoop praktyke wat goed werk om die ooie in ’n groeifase te kry, is om hulle na ruskampe te verskuif of om hulle te skeer.
Prikkelvoeding kan ook gebruik word, maar dit kos geld. Die dierevoedingkundige dr. Jasper Coetzee het altyd daarop gewys dat nét daardie ooie wat in die verlede tweelinge gehad het, by prikkelvoeding baat vind. Tog is dit goeie praktyk om alle ooie tydens droogtes met prikkelvoeding te stimuleer.
Die kondisie van die ooi by speentyd speel ook ’n groot rol by die daaropvolgende besetting. Die teikenkondisiepunt aan die begin van die dektyd is 3 en minstens 2,5 met speentyd.
Dit help ook nie om die ooie gereed te kry vir paring, maar die ramme bring nie hul kant nie. Die ramme moet in ’n goeie kondisie