KOMPETISIE GEMIK OP VOORUITGANG
Produktiwiteit en doeltreffendheid is van die groot dryfvere agter ekonomiese volhoubaarheid in die landbou. Om ’n bietjie gesonde mededinging in dié prentjie in te bou, is ’n lekker manier om boere aan te spoor om selfs nóg beter te presteer.
Graan SA het verlede jaar die eerste keer die Groei vir Goudnasionale opbrengskompetisie aangebied. Die 2021-weergawe van dié kompetisie is vroeg vanjaar aangekondig.
Graan SA sê opbrengskompetisies soos dié bied ’n skatting van die opbrengspotensiaal onder soortgelyke omstandighede vir ’n spesifieke streek. Dit spoor produsente aan om uitstekende resultate te behaal, gee erkenning vir nuwe en baanbrekerboerderypraktyke en beloon vernuwing. Die mededingingsprotokol is saam met alle saadondernemings verfyn om die beoordeling van alle deelnemende produsente – van klein tot kommersieel – volgens dieselfde kriteria te verseker.
“Die ekonomie van graanproduksie en die optimale vlak van winsgewendheid is van die belangrikste faktore vir Graan SA. Hierdie platform sal ’n bietjie dieper delf in statistieke oor rekordopbrengsgewasse om die doeltreffendheid en volhoubaarheid van graanprodusente verder te bevorder,” sê dr. Dirk Strydom, bestuurder van graanekonomie en bemarking by Graan SA.
Nuwe produksiepraktyke en vindingryke boerdery is noodsaaklik om ’n rekordopbrengs te behaal. Dié kompetisie moedig sulke praktyke aan.
Graanprodusente ding mee in 16 kategorieë, waaronder droëland en besproeiingsgrond, op streeks- en nasionale vlak. Die mikpunt is om die hoogste opbrengs per hektaar te behaal, ongeag die kultivar wat aangeplant is.
Alle Suid-Afrikaanse graanprodusente wat mielies, sojabone en sonneblomme verbou, word genooi om deel te neem aan vanjaar se Groei vir Goudnasionale opbrengskompetisie. Koringboere kan ook uitsien na hul eie afdeling in die 2021-kompetisie.