ADVERTEERDER BEDRIEG LBW-LESER
DIE polisie in Morgenzon, Mpumalanga, ondersoek ’n klag van bedrog nadat ’n adverteerder in Landbouweek
blad klaarblyklik spoorloos verdwyn het nadat hy meer as R100 000 van ’n voornemende koper ontvang het vir ’n staalskuur wat hy geadverteer het.
Mnr. Julian Muller, ’n boer van Morgenzon, het op 30 September die advertensie in
Landbouweekblad onder die naam van Bezuidenhout Game Safari gesien, wat onder meer twee staalskure en rolle veldspandraad met sparre en pale geadverteer het.
Daar was ’n kantoornommer en drie mense se selfoonnommers by wie navraag gedoen kon word.
Hy het op Vrydag 1 Oktober met ene Johan Bezuidenhout gepraat en gereël om die een skuur vir R103 500 te koop. Muller het die geld oorbetaal ná Bezuidenhout ’n faktuur en ander dokumentasie aangestuur het.
‘BAIE OORTUIGEND’
“Hulle sou die Maandag die staalplate in Thabazimbi laai en teen Dinsdag kom aflewer het,” sê Muller.
“Alles was baie oortuigend. Hy het aanvanklik gesê daar is ’n moontlike koper en hy sal net by sy pa moet seker maak dat die skuur nie al verkoop is nie. Daarna het hy teruggeskakel en gesê dit is nog beskikbaar en ek kan dit koop. Selfs die vragmotorbestuurder het my gekontak oor die roete na my plaas.”
GEEN ANTWOORD
Toe hy die Dinsdag wou seker maak oor die tyd van aflewering, het niemand meer enige van die nommers beantwoord nie. Hy het ook vasgestel die BTW-nommer op die faktuur bestaan nie.
Die advertensie het op bl. 96 in die 30 September-uitgawe van Landbouweekblad verskyn. Intussen blyk dit dat die betaling vir die advertensie nie deurgegaan het nie.
Alle pogings om met die adverteerders kontak te maak, was vrugteloos. Die advertensie is verwyder van Landbou.com, maar verskyn nog in die tydskrif se uitgawes van 7 en 14 Oktober. Soreen Hoffmann, hoof van
Landbouweekblad se geklassifiseerde verkope, sê dit laat haar dink aan ’n soortgelyke advertensie onder die naam van ’n safari-onderneming sowat ’n jaar gelede wat wildheinings adverteer het. Dié adverteerder kon nie vir die betaling opgespoor word nie.