Limpopo-forum soek boere se hulp in dié diefstalstudie
SPESIALE eenhede, strategieë en maatreëls bestaan om veediefstal te bekamp, maar die diefstal van landbouprodukte, veral groente en vrugte, is ’n ewe groot probleem, sonder soortgelyke maatreëls daarteen.
Die Limpopo landelike veiligheidsforum (LLVF) het nou met ’n projek begin om saam met die polisie ’n strategie teen plaasprodukdiefstal op te stel, sê mnr. Drickus Botha, uitvoerende hoof van TLU SA Noord. Daar word beoog om dit later landwyd uit te brei.
Lede van TLU SA Noord en Agri Limpopo dien in die forum en worstel al geruime tyd met die groot hoeveelhede produkte wat op plase gesteel word. “Dit is nie net gereedvireetprodukte nie, maar ook groente en vrugte wat nog nie volwasse is nie en wat snags in bakkievragte weggery word. Hierdie produkte beland dikwels op die informele mark, wat ’n verlies aan inkomste vir die formele markte en ander organisasies in die waardeketting beteken,” sê die LLVF.
Volgens Botha is die polisie bewus van die probleem, maar omdat daar nie rekord gehou word soos in die geval van veediefstal nie, is die polisie nie ingelig oor die omvang van of geldelike verliese wat produkdiefstal veroorsaak nie.
Die LLVF het, saam met ’n universiteit en ’n bekende landelike misdaadnavorser, ’n vraelys opgestel om basiese inligting te versamel.
Boere en produsenteorganisasies word versoek om aan die navorsing deel te neem deur die vraelys te voltooi. Dit word anoniem gedoen en geen persoonlike besonderhede word gevra nie. Kontak Botha by
drickusb@gmail.com om deel te neem.