Handelaar se hulp laat groenteboer se besigheid groei
DANKSY die praktiese benadering van die koopspan by ’n kettingwinkelgroep en ’n gaping in die mark het ’n Gautengse kleinboer, mnr. Kepas Melodi, sy agterplaas-bedryf in ’n suksesvolle onderneming omskep. Hy is nou ’n verskaffer vir dié groep, Shoprite.
Volgens Melodi skep die verhouding tussen boere soos hy en Shoprite se koopspan ’n gevoel van sekerheid in ’n soms onvoorspelbare bedryf. Só kry hy ’n beter idee wanneer hy wat moet plant om sy grond optimaal te benut, en te midde van die covid-19-pandemie sy besigheid uit te bou.
Sy harde werk het lank voor covid-19 begin toe hy nog by die Hazyview-varsproduktemark gewerk het. In reaksie op ’n tekort aan spinasie het hy dié groente begin plant, en dit aanvanklik by varsproduktemarkte en deur smouse verkoop. Dit het egter die invordering van winste en aanplanting bemoeilik.
“As die aankoper by die mark nie al my voorraad kon oorkoop nie, moes ek baie hard probeer om die surplus te verkoop. Daar was baie probleme met die afhaal van produkte, en só is baie van my voorraad vermors.”
Sake het in 2012 verbeter toe hy ’n paar kratte groenboontjies en mielies aan Shoprite-winkels in Gauteng begin verskaf het. “My onderneming werk nou soveel beter. Ek kan dit wat die aankopers wil hê aan hulle lewer, en die opbrengs van my harde werk gaan direk bank toe.”
Hy lewer gereeld groenboontjies, rissies en botterskorsies aan honderde Shoprite-winkels in Gauteng. Mnr. Khutso Rapudubudu, aankoper van die winkelgroep, hou hom goed ingelig oor markverwante kwessies. Dít is volgens Melodi noodsaaklik, veral wanneer hy beplanning moet doen.
“Sy span sal my aanraai om spesifieke produkte aan te plant as dit skaars is. Die span gee ook raad oor geleenthede, soos wanneer boere elders nie sekere produkte kan lewer nie. Dit help my ook met omgewingskwessies, soos gewassiklusse, sodat ek ingeligte besluite kan neem.
“Wanneer ek groente plant, het ek nou ’n mate van sekerheid en weet ek waarheen ek my produkte sal neem.”