OORDRAGVOORRAAD SE STRUIKELBLOKKE
Hoewel die bedryf oor die breë spektrum “bloei”, hoofsaaklik weens die ooraanbod van wyn vanweë stadige verkope en spesifiek die vyf en ’n half maande wat dit toe was, is daar individuele ondernemings wat steeds goed vaar, meen mnr. Phillip Retief, besturende direkteur van Van Loveren buite Robertson.
“Dit is daardie ondernemings wat ’n sterker aanslag op die buitelandse mark het en gehelp is deur die wisselkoersverswakking in 2020, en ander wat baie van hul kelderdeur verkope na aan lyn verkope kon kanaliseer, asook dié wat sterk handelsmerke op winkelrakke kon behou.
“Frankryk, Spanje en Italië het wesenlike rypskade in April ondervind, en na raming sal hul huidige oes drasties kleiner wees. Dit kan vir Suid-Afrika verligting bring, en hopelik kan dit beteken dat van ons surplus aan hierdie lande of hul afsetpunte verkoop kan word.
“Die pryse sal moontlik nie volhoubaar wees nie, maar minstens kan dit help om ons vraag en aanbod in beter ekwilibrium te bring.
“Op die plaaslike mark is die bekommernis dat die neiging van glasverkope na boksverkope (meer waarde, maar wesenlik laer marges) nie teruggedraai gaan word weens die swak ekonomie en verbuikerspatrone nie. Dus behoort volumes daar te wees, maar nie noodwendig met dieselfde besigheidsmodel vir sekere maatskappye nie.”
Suid-Afrikaanse wingerdstand-vlakke is relatief oud met 42% van wit druiwe ouer as 15 jaar en 61% van rooi wingerde ouer as 15 jaar. “Die impak hiervan is nog onseker, maar logika dui daarop dat dit in die toekoms ’n impak op produksie sal meebring.
“Ons gaan einde Desember met die grootste oordragvoorraad in ons geskiedenis in wyntenks sit met die nuwe oes wat in Januarie 2022 begin. Elke besigheid gaan sy model en volhoubaarheid deeglik en vinnig in oënskou moet neem, indien dit nie reeds te laat is nie.
“Ons moet meer premiewyn verkoop, en al beteken dit ’n kleiner bedryf in geheel, sal dit ook baie van die risiko’s rondom regulasies en opinies verminder en weerlê. Met die huidige surplus word hierdie aspirasies vir baie eers op die lange baan geskuif, maar dit moet ’n oorkoepelende langtermyndoelwit wees.”