WAT SÊ KOMMERSIËLE BOERE?

Mnr. Attie Scholtz, ’n bekroonde besproeiingsboer naby Douglas, sê die organiese prosesse wat gevolg moet word om organies gesertifiseer te word, sal nie deug in ’n konvensionele boerdery wat grootmaatprodukte kommersieel moet bemark nie. Die opbrengs verskil te veel.

“Organiese boerdery bedien ’n nismark, wat ek nie doen nie. Hoewel talle kommersiële boere deesdae meer biologiese prosesse volg, kan ek nie bekostig om produksie ter wille van organiese beginsels in te boet nie. Toe kunsmis so duur geraak het, het ek hoendermis en gips op my landerye gegooi. Ek kon aan die beter mielieen koringoeste sien dat my grond en pH-balans gesonder is. Selfs die erdwurms het teruggekeer. Jy moet die grondorganismes aanhelp en die grond gesond hou deur dieremis en ander misstowwe te gebruik.

“Dit is egter baie moeilik om heeltyd etlike tonnemaat hoendermis, kompos of humus op groot landerye te gebruik. Ek pas ook wisselbou in ’n skedule toe, plant lusern en laat my landerye rus. Daar is nie altyd tyd om tussen twee oeste per jaar organiese misstowwe te strooi nie. Daarom moet ’n kommersiële boer bykomende voedingstowwe gebruik.”

Nog ’n boer, wat erken dat hy dalk te oud vir nuwe projekte is, dink nie organiese boerdery is die moeite werd nie. “Ek gebruik wel organiese metodes om dekgewasse, soos hawer en weiwieke, tussen my neutbome te plant wat die grond koeler hou en voedingstowwe in die grond vaslê. Dit is ’n nismark en kan slegs werk as jy uitvoer. Ek gebruik ook nie organiese kunsmis nie. Jy boet produksie in, en dit haal jou in. Sekere produkte, soos patats, word te veel deur organismes, soos aalwurm, aangeval. Dalk bewys jonger boere my verkeerd.”