Cavalier – ondersteun boerdery vir die toekoms
Deur aanhoudende vernuwing het Cavalier gegroei van ’n klein lamsverspreidingsonderneming in 1998 tot ’n unieke rooivleiswaardeketting.
Die Cavalier-groep bestaan uit ’n unieke rooivleiswaardeketting met die filiale Cavalier Livestock, Cavalier Feeders, Cavalier Abattoir en Cavalier Foods. Die groep lewer top-gehalte rooivleis, onder meer aan een van Suid-Afrika se vernaamste winkelgroepe wat sinoniem met gehalte is.
Tesame met gehalte van die eindproduk, word volhoubaarheid van die rooivleisbedryf gereeld onder die vergrootglas geplaas. Hier het Cavalier ’n geleentheid geïdentifiseer om die voortou te neem binne die Suid-Afrikaanse veebedryf.
Die gunstige impak wat diereproduksie op die omgewing kan hê, in teenstelling met die ongunstige lig waarin die bedryf gereeld gestel word, word al hoe meer internasionaal besef – en dit is belangrik om hierdie boodskap aan die verbruiker en boer oor te dra.
Voedselproduksie moet teen 2050 verdubbel om die groeiende menslike bevolking te voed. Ons sal meer moet produseer met minder hulpbronne. Terselfdertyd neem grondgehalte wêreldwyd af, wat verdere probleme veroorsaak. Gesonde grond hou meer water, ondersteun gesonde mikrobiome, benodig geen sintetiese insette nie en produseer voedingstofryke voedsel en voer.
Praktyke wat die grond skade aandoen, sluit onder meer ploeg, chemiese bemesting, monokultuur, voortdurende weiding, onoordeelkundige brande, en gras- en oesreste in.
Daar is egter ook boerderypraktyke wat kan bydra tot die verbetering van die grond. Dit sluit geenbewerking, dekgewasse, diversiteit, organiese materiaal, die stimulering van grondmikrobiologie, die herbekendstelling van diere aan gewasrotasie, en herlewingsweiding in.
Dit is biochemies onmoontlik dat herkouers meer koolstof vrystel as wat hulle in hul rantsoen inneem. Hulle sirkuleer koolstof. Vee kan koolstof-sekwestreerders, gewers van voedsame voedsel en omgewingsredders wees. Hulle kan help om ons grond te red.
Volhoubare landbou wat slegs na ’n kleiner omgewingspoor streef, kan nie meer die enigste doel wees nie. Die landbousektor het ’n verantwoordelikheid (en geleentheid) om die planeet te laat herleef.
Deur in kontak met boere te bly, kan die Cavalier-span boere ondersteun en toerus vir landboupraktyke wat dierewelstand bevorder, agteruitgang van die omgewing verminder deur beter doeltreffendheid, en só help om die boerdery se impak om te keer en by te dra tot die herstel van die grond en ons planeet.
Cavalier werk voortdurend om ’n vertikaal geïntegreerde waardeketting op te bou wat ekonomies volhoubaar is en nie net lewensgehalte bied nie, maar ook voedingstofryke vleis van hoë gehalte lewer, terwyl die omgewing en die hulpbronne vir volgende geslagte bewaar word.
Deur met die beste boere in Suid-Afrika saam te werk, verkry Cavalier gehaltevee, én maak hy volhoubaarheid ’n voorrangsaak.