KZN-BOERE VOER ALLEENSTRYD TEEN BETREDERS
DIE geskil oor geskutte vee wat onwettig op ’n plaas by Glencoe in KwaZuluNatal gewei het, en wat gelei het tot die dood van die 17jarige mnr. Qiniso Dlamini op 29 September, was hoegenaamd nie ’n geïsoleerde geval nie.
Mnr. Garth Millen Simpson (68) het einde September in die Glencoelanddroshof verskyn op klagte wat verband hou met Dlamini se skietdood. ’n Video is kort ná die voorval wyd op sosiale media versprei wat toon hoe Dlamini en twee ander mans Simpson aanval, vermoedelik om Simpson se vuurwapen af te neem. In die skermutseling gaan ’n skoot af en Dlamini val neer.
“Alle boere by Glencoe loop deur onder vee wat hul weiding en gewasse verniel. Dit is onwettig. Ingevolge die wet het die eienaars die reg om hierdie diere te skut,” sê me. Sandy la Marque, uitvoerende hoof van die KwaZuluNatalse landbouunie (Kwanalu).
Sy sê Kwanalu is diep besorg daaroor dat menige klagte van boere wat verband hou met betreding en onwettige beweiding wat by die polisie aangemeld is, na bewering nie volledig ondersoek is nie, en dat niemand vervolg word nie.
Volgens haar het dié deurlopende gebrek aan wet en orde bygedra tot die volgehoue miskenning van eiendomsreg en verhoogde spanning tussen grondeienaars en buurgemeenskappe.
PARTYDIGHEID
Intussen het ’n prokureur wat Simpson ná die skietery vir twee dae verteenwoordig het, sy kommer uitgespreek oor die oënskynlike partydigheid teen Simpson, sy prokureurs en familie.
Mnr. Jacques Botha, van Kloof buite Durban, het ernstige vrae oor die landdros en die aanklaer met Simpson se eerste hofverskyning.
“Die aanklaer was huiwerig om na die video te kyk. Ten spyte daarvan dat sy daarna na die video gekyk het, het sy aan die hof gesê dat dit ’n beplande en opsetlike moord is wat ingevolge bylae 6 (ernstigste misdade) hanteer word. Ek beskou dit as absoluut onaanvaarbaar in die lig van die getuienis.”
Botha wou ook hê die landdros moet na die video kyk, want die inhoud daarvan “sou die skedule verander het waarin hierdie saak hanteer moet word. Die video het die hele prentjie verander en dit was eintlik in alle opsigte verontskuldigend, maar die hof het geweier. Waarom sou ’n landdros wat veronderstel is om onpartydig te wees, weier om na getuienis te kyk? Hy het geweier om daarna te kyk.”
VEILIGHEID
La Marque sê Kwanalu het hoëvlakgesprekke gevoer om openbare orde tydens Simpson se hofverskynings te verseker.
Adv. Elaine Zungu, KwaZuluNatalse direkteur van openbare vervolging, wou nie kommentaar lewer oor die optrede van die landdros en die aanklaer nie.