GRAANBOERE SPOOK MET WISSELVALLIGE TOESTANDE
DIE stropery in die somerreëngebied het begin spoed optel nadat baie reën die proses aanvanklik vertraag het. Opbrengste wissel van swak weens die reënskade tot rekordoeste op plekke.
Volgens mnr. Wandile Sihlobo, hoofekonoom van die landbousakekamer Agbiz, was vooruitsigte ná weke se baie reën sonniger vir die res van Mei. “Dit sal gunstiger omstandighede vir die stroopproses in baie dele skep en die proses verhaas waar daar gestroop kan word.
“Teen die 20ste sal daar waarskynlik ’n effense afname in graanboere se bedrywighede wees wanneer baie van hulle die Nampo-oesdag bywoon. Daarna sal die proses weer voortgaan.”
NOORDWES
Mnr. Derek Mathews, voorsitter van Graan SA, sê in dele van Noordwes is dit nog baie nat en stropers val vas, maar baie van die vroeë sonneblomme is al gestroop. “In dele by Sannieshof het Sclerotinia skade veroorsaak en die opbrengste was swak, maar hier by ons by Sannieshof na Mareetsane se kant toe was daar geen skade nie en die opbrengste was goed. Dit wissel dus baie.
“Die mieliestropery is nog ’n entjie weg in ons deel van Noordwes. Daar is kommer oor skade weens die nat omstandighede en dat ’n groter persentasie mielies as ’n swakker graad geklas sal word.
“Grondbone het ook skade en kan nie meganies geoes word nie omdat die stingeltjies swak is. Dit word met die hand gepluk om skade te beperk.”
Hy sê by Schweizer-Reneke is boere druk besig om sojabone te stroop en daar is goeie opbrengste. “Hulle praat daar van rekordopbrengste ondanks reënskade vroeër in die seisoen.”
SOJABONE
Dr. Werner Rossouw, handelaar en direkteur van Silostrat, sê dit wil voorkom of daar ook baie goeie sojaboonoeste in die sentrale en westelike dele van die Vrystaat is. “Die stroopproses is volstoom aan die gang en dit lyk of sojabone die baie reën goed deurstaan het. Die oes sal waarskynlik teen einde Mei klaar gestroop wees. Die goeie oeste kan daartoe lei dat meer sojabone later vanjaar geplant sal word.”
In teenstelling hiermee word sonneblom volgens hom nog net plek-plek gestroop en die oesproses sal waarskynlik tot in Julie voortduur. “Mieliestropery is nog nie grootskaals aan die gang nie. In sekere distrikte word al van die vroeë aanplantings gestroop.
“Daar is wel gehalteprobleme ondervind en baie WM2en WM3-graad mielies word gestroop. Dit lyk of die latere aanplantings se gehalte beter sal wees.
“Na verwagting sal die meeste boere ná die Nampo-oesdag sterk aan die gang kom om mielies te stroop en dan sal ons ’n beter idee van opbrengste kry.”
Mnr. Hennie Bruwer, uitvoerende hoof van Katoen SA, verwag dat die katoen-stroopproses eers in Junie momentum gaan kry.
WINTERGRANE
Wintergraanboere in die WesKaap is besig om te plant, maar sukkel oral met droë grond wat wel effens verlig is deur reën oor die naweek van 7 Mei, sê mnr. Henk de Beer, hoofbestuurder: bedrywe by Sentraal-Suid Koöperasie (SSK).
Hy is nie bewus van boere wat hul kunsmisprogramme verander het of nie kunsmis kon kry nie. “Sover ek weet, kon almal voldoende kunsmis bekom en moes niemand wysigings maak aan hul gewone bemestingsprogramme nie, buiten dat hulle natuurlik baie duurder daarvoor betaal.”
Hy is nie seker of dieselfde bobemesting sal geld nie. “Ek vermoed boere sal dalk eerder vroeër as later aankope doen om lewering te verseker.”
Hy glo die hoër koringprys bied in ’n mate ’n teenvoeter vir die hoër kunsmisprys, maar boere van die SSK-streek was versigtig om pryse vas te maak voordat hulle seker is van hul koringopbrengs en -graad.
Die koste van brandstof en plaagbestrydingsmiddels wek ook kommer. “Ons vertrou dat insetkoste en graanpryse in dieselfde ‘siklus’ bly sodat goeie graanpryse sal vergoed vir die huidige hoë insetkoste.”