HAWE-CHAOS VEROORSAAK REUSE-AGTERSTANDE
DIE aankondiging van mnr. Pravin Gordhan, minister van openbare ondernemings, dat werksaamhede by die Durbanhawe op 20 April, sowat ’n week ná die rampvloede in KwaZulu-Natal, byna heeltemal hervat het, was skynbaar voortydig.
Mnr. Johann Basson, logistieke bestuurder vir die Fruit Trade-groep, het aan Landbou. com gesê kragtoevoer na sy koelkamer in Pinetown is eers op 5 Mei herstel ná dit die aand van 11 April onderbreek is. Intussen kon die aanleg met kragopwekkers teen 50% van sy normale kapasiteit funksioneer.
Basson sê die vernaamste rede dat werksaamhede nog nie genormaliseer het nie, is die feit dat verskeie toegangsroetes en spoorlyne steeds herstel word.
Luidens berigte was die Bayhead-substasie eers op 3 Mei weer aanlyn. Herstelwerk aan 16 minisubstasies in die hawe se netwerk duur voort en sou na verwagting teen 13 Mei voltooi wees. Sommige aanlegte sou tot dan sonder krag wees.
Dr. Kandas Cloete, senior ontleder vir tuinboukunde by die buro vir voedsel- en landboubeleid (BFAP), sê die Durbanhawe se kaai 1 en kaai 2 was as gevolg van die vloede sowat twee dae glad nie in bedryf nie. Dit het selfs langer geduur om vraghouers te verskuif aangesien paaie onbegaanbaar was.
Die aflewering van vraghouers vir uitvoer by kaai 1 het volgens haar vir ’n week, van 12 tot 18 April, bykans stilgestaan.
In dié tyd is 390 vraghouers vir uitvoer by kaai 2 afgelaai, terwyl daar die vorige week 3 302 vraghouers by kaai 1 en 7 840 vraghouers by kaai 2 afgelaai is.
Hoewel hyskrane in werking was en vragte dus op- en afgelaai kon word, kon vragte nie die hawe bereik nie.
“As ons die huidige sitrusseisoen met die gemiddeld vir die vorige twee jare vergelyk, was 2022 se sitrusuitvoer in week 15, 16 en 17 onderskeidelik 38%, 40% en 57% van die gemiddelde volumes vir 2020 en 2021. Week 18 se data is nog nie beskikbaar nie, dus weet ons nie of uitvoervolumes al na normaal teruggekeer het nie.”