AngusBeef boervooruit
Die vraag na rooivleis is steeds hoog, ondanks die sukkelende wêreldekonomie, en Suid-Afrikaners verbruik steeds meer rooivleis as wat die bedryf kan produseer. Angus Beef bly aan die voorpunt van die Suid-Afrikaanse vleisbedryf.
Die grootste beesvleishandelsmerk ter wêreld is Angus Beef. Wanneer gekyk word na lande soos Amerika, wat die grootste Angus-beeskudde ter wêreld het, word daar selfs in plekke soos McDonald’s Angus-burgers verkoop.
Vertroue is oor baie jare by die produsente en verbruikers van Angus-vleis geskep. Verbruikers besef dat die gehalte en naspeurbaarheid van die produk wat hulle op ’n daaglikse grondslag geniet, van groot belang is. Produsente, aan die ander kant, besef dat dit belangrik is om jou van ander markte te onderskei om winsgewender te kan boer.
WAT IS ANGUS BEEF?
Ek wil teruggaan na die begin en boere meer vertel oor wat Angus Beef is en hoekom ons in Suid-Afrika so trots op die ras en die produk is.
Die Angus-beesras is een van baie min rasse wat van die begin af vir vleis geteel is. Angus-beeste het die vermoë om vleis te produseer wat duidelik onderskei kan word wat gehalte betref. Angus-vleis is bekend om ’n paar eienskappe wat die produk onderskei. Dit is smaaklik, het uitstekende marmering, is sappig en besonder sag.
Telers het besef Angus-vleis is ’n nisproduk en dat dit onderskei moet word van ander vleis. Só het die Angus Beefhandelsmerk ontstaan.
Die Angus-beestelersgenootskap bestaan uit al die Angus-stoettelers in Suid-Afrika en sorg vir teelmateriaal wat uit die grootste genepoel ter wêreld bekom word om hierdie produk deurlopend te produseer. Die telers van Suid-Afrika het die Angus Beef-maatskappy gestig om die produk direk aan die verbruiker te verskaf.
SOUTH AFRICAN ANGUS BEEF
Die doel van die Angus Beef-maatskappy is nie net om sy unieke produk te beskerm nie, maar ook om die verbruiker te beskerm. Indien ’n verbruiker Angus-vleis in ’n winkel, slaghuis of deli koop en die etiket met die bewoording South African Angus Beef is daarop aangebring, kan jy met ’n geruste hart weet jy kry wat jy koop.
Navorsing wêreldwyd toon dat verbruikers om verskeie redes ál meer bewus word van die produk wat hulle gebruik. Verbruikers wil weet waarvandaan die vleis kom wat hulle eet en hoe dit geproduseer word.
Ons het gaan kyk na wat die SuidAfrikaanse mark vereis en hoe ons die Suid-Afrikaanse boer en die verbruiker nader aan mekaar kan bring. Gehaltekontrole word uitgevoer om te verseker dat ’n unieke en betroubare Angus-produk aan verbruikers verskaf word.
Telers het besef Angusvleis is ’n nisproduk en dat dit onderskei moet word van ander vleis. Só het die Angus Beef-handelsmerk ontstaan.
SÓ BEPAAL ONS GEHALTE
Angus-speenkalwers vir die South African Angus Beef-program word van goedgekeurde Angus-boere gekoop.
Hierdie boere word deur ’n verteenwoordiger van die ras besoek om te verseker dat die persoon se boerderypraktyk en sy koeikudde in ooreenstemming is met die protokol wat geregistreer is.
Deur die protokol te onderteken, onderneem hierdie boere om Angus-kalwers te produseer volgens die onderstaande vereistes om te verseker dat ons voortdurend ’n gesonder produk direk van die boer aan die verbruiker lewer.
Die vereistes waaraan goedgekeurde Angus-boere moet voldoen, sluit in:
■ Slegs rasegte Angus-beeste met die kenmerkende fenotipiese eienskappe van die Angus-ras mag gebruik word.
■ Die moeder van die slagdier moet ’n derdegenerasie-Angus-koei wees, wat al die fenotipiese eienskappe van die Angusras vertoon.
■ ’n Geregistreerde Angus-bul moet die
slagdier se vaar wees.
■ Geen groeibevorderaars, groeihormone of roetine-antibiotika mag toegedien word, en geen dierebyprodukte mag vir die slagdier gevoer word nie.
KOOP ANGUS BEEF HIER
Daar is verskeie instellings wat by die Suid-Afrikaanse Angus Beef-handelsmerk inskakel. Hierdie netwerk wat ons die afgelope paar jaar geskep het, verseker dat ons besig is om ’n baie goeie model te bou waarvolgens ons gesonde, hormoonvrye vleis by die verbruiker kan kry.
Angus Beef is ook landwyd in Woolworths-winkels beskikbaar. Drie jaar gelede het Angus Beef met Woolworths hande gevat om hierdie uitstekende produk op groot skaal, maar steeds teen uitmuntende gehalte, by die verbruiker te kry.
Tans word Angus-kalwers vir die Woolworths Angus Beef-program by vier private voerkrale reg oor Suid-Afrika gevoer. Vandaar word hulle geslag en reg oor die land na Woolworths-winkels vir die verbruiker versprei. Dit gaan baie goed met die Woolworths Angus Beef-handelsmerk en verbruikers besef stadigaan dat dit die moeite werd is om Angus Beef op ’n permanente grondslag in hul kombuis te gebruik.
Die Angus Beef-maatskappy is deurlopend besig om nuwe markte te ontwikkel. Die vraag na Angus-vleis is in hierdie stadium baie groter as wat ons kan voorsien, wat ’n baie gesonde plek vir die handelsmerk is. Boere moet besef dat dit ’n besonderse geleentheid is om deel te word van ’n ras waar daar ’n nismark aan die voorpunt vir die vleis is.
Ons is baie opgewonde oor die toekoms en ons glo dat Angus-vleis binne die volgende paar jaar op almal se borde sal wees.
Word deel van die ras en kom deel in ons passie en die toekoms van vleis.
Mnr. Danie Dames is die rasadviseur van die Angus-beestelersgenootskap van SuidAfrika.
NAVRAE: Angus-beestelersgenootskap van Suid-Afrika, e-pos: info@angus.org.za, 051 447 9849; web: angus.org.za