Beproefdeteelmateriaal
Die Angus Alliance-produksieveiling, wat op 12 Augustus om 11:00 by Kroon Boma buite Kroonstad gehou word, beloof om weer topgehalte-teelmateriaal aan te bied.
Die telersgroep Angus Alliance is bekend om sy kampioene. Dié groep spog met altesaam 15 goue bekers en 16 SA grootkampioene op die vorige 12 rooi Angus- nasionale kampioenskappe. Kortom, 66,7% van Suid-Afrika se grootkampioene oor die afgelope 23 jaar kom uit Alliance se stalle.
Alliance bestaan uit die stoeterye Loumotta (mnre. Loutjie en Wilru Campher), Roechama (mnre. Gert en RC Malherbe) en Vansia Angus (mnre. Johan en JM Steyn).
Alliance se doelwit is om rooi en swart Angus-teelmateriaal in ’n aanpasbare, funksionele en hoogs produserende pakket aan die Suid-Afrikaanse stoet- en kommersiële beesboer te verskaf. Om dít te bewerkstellig, is hoogstaande gehalte uiters belangrik. Een van Alliance se grootste hulpmiddels is die gesamentlike 650 geregistreerde Angus-koeie waaruit die veilingdiere geselekteer word.
Hierdie ingesteldheid op gehalte verseker dat kopers met vertroue jaar ná jaar deel kan wees van die sukses van die stoeterye. Bulle vanuit die Alliance-kuddes word met groot sukses landwyd gebruik, asook in Botswana en Namibië.
Angus Beef is deesdae ’n gons-onderwerp in die vleisbedryf. Een van die grootste probleme vir kommersiële beesboere om premiepryse vir Angus-vleis te behaal, is die verkryging van vroulike Angus-diere van gehalte. Om die proses vir boere te vergemaklik, gaan Angus Alliance mnr. Hendrik Botha se kommersiële Angus-verse op toekomstige produksieveilings aanbied. Botha is een van Alliance se vertroude klante en ’n voorloper in die Angus Beef-program.
Elke bul wat op die Angus Alliance-veiling aangebied word, is deur ’n veearts getoets en
gekeur vir geslagsgeskiktheid en gesertifiseer as vry van trichomoniase, vibriose, besmetlike misgeboorte en tuberkulose.
Angus Alliance se veiling word deur André Kock en Seun Afslaers aangebied. NAVRAE: Mnre. Wilru Campher, 082 090 6454, e-pos: wilrucampher@gmail.com; RC Malherbe,
084 851 8262, e-pos: malherberc8@gmail. com; JM Steyn, 072 408 5699, e-pos: vansia@ mics.co.za; web: angusalliance.co.za