Angusse suksesgroei
By die Malherbe-boerdery in die Vrystaat streef almal daarna om net die beste aan te bied.
Die vraag na Angus-produkte toon groot belofte. Mnre. André, RC en Gert Malherbe van die plaas Graslaagte, Hertzogville, wil munt slaan daaruit. “Angus-beeste, met hul goeie temperament, moeders met baie melk en swaar speenkalwers, vaar uitstekend hier by ons,” sê RC.
“Ons meen dat die ras se sukses in die volgende paar jaar verder gaan groei. Die kommersiële sy van die Angusse word veral uitgebrei danksy die stygende vraag na Angus-kalwers. Die Woolworths-Angus-projek vaar uitstekend. Die vraag deur private slaghuise na Angus-produkte is ook goed.”
Die Malherbes bedryf al jare lank die suksesvolle Roechama-stoetery wat uit sowat 300 Angus-teelkoeie bestaan. Hulle het ook ’n Brangus-stoetery met 300 teelkoeie, ’n SA Vleismerino- en Suffolk-stoetery, en kommersiële Angusse en Brangusse.
Hul gemengde boerdery se hoofvertakking is mielieverbouing, met sonneblomme en koring as wisselbougewasse. In die winter word die mieliereste bewei, asook hawer en radyse wat bykomend aangeplant word. Die plaas het hoofsaaklik soetgras met ’n drakrag van 10 ha per grootvee-eenheid.
RC meen dit is belangrik om aan skoue deel te neem.
“Dit is waar jy jou met die beste kan vergelyk en kyk of jou teeldoelwitte vrugte afwerp.”
Die sukses van hul streng seleksie van teelmateriaal was te sien op die afgelope twee nasionale kampioenskapskoue waar hulle as Teler van Kampioene aangewys is.
RC sê produksieveilings is vir hulle baie belangrik omdat kommersiële boere dan bepaal of hul diere op standaard is.
“Ons bemark ons diere op twee veilings. Die eerste is die Angus Alliance-veiling, vanjaar op 12 Augustus by die Kroonboma op Kroonstad. Die aanbod is 35 bulle, 35 vroulike stoetdiere en 50 kommersiële verse. Die Malherbe-Roberts-veiling word op 28 September op Hertzogville gehou. Te koop is 25 Angus-bulle, 45 Brangus-bulle, 30 vroulike Brangus-stoetdiere en 100 kommersiële vroulike diere.”
NAVRAE: Web: www.roechama.co.za; mnr. RC Malherbe, e-pos: malherberc8@gmail.com