Angusverbeterkudde
Wanneer enige beesras met ’n Angus-bees gekruisteel word, kan die vleisgehalte en bouvorm aansienlik verbeter word. Boere in Afrika het dus vinnig besef die Angus is die beesras van die toekoms.
Die Angus-beestelersgenootskap van Suid-Afrika is in 1917 gestig met 12 lede. Die genootskap het die amptelike sertifikaat van inlywing op 23 Maart 1921 ontvang. Die genootskap bestaan tans uit 140 geregistreerde stoettelers en 18 000 geregistreerde stoetdiere.
Die Angus-beesras is oorspronklik van twee aangrensende Skotse provinsies, naamlik Aberdeenshire en Angusshire.
Die eerste swart Angus-diere is in 1895 na Suid-Afrika ingevoer na die plaas van mnr. Charles Newberry in die Vrystaat. Hierdie Angus-diere het goed met die plaaslike inheemse rasse gekruis en mettertyd hul stempel op die Suid-Afrikaanse mark afgedruk.
Mnr. E.W. Bassingtwaighte van Windhoek in Namibië was die eerste teler van
rooi Angusse. In die vroeë 1950’s het mnr. Barry Kramer die eerste rooi Angusse na Suid-Afrika ingevoer.
Rooi Angusse het vinnig gewild geraak in Suid-Afrika.
Sowat 69% van alle geregistreerde Angusse in Suid-Afrika is rooi. Daar is egter geen wesenlike verskil tussen die swart en rooi Angus nie en dit bly die boer se keuse waarmee hy wil boer.
Die Angus-beestelersgenootskap help boere graag met die keuse van hul volgende aankope, en verleen algemene raad en hulp aan stoet- en kommersiële telers.
Die genootskap is opgewonde oor die toekoms van die Angus in Suid-Afrika.
Die groei in die ras se pryse die afgelope paar jaar wat manlike en vroulike diere betref, is tekenend van die potensiële groot mark vir die Angus-beesras in Afrika. NAVRAE: Web: www.angus.org.za, e-pos: info@angus.org.za, 051 447 9849.