EEN MILJOEN MENSE BESOEK GROOTSTE LANDBOUSKOU

Op die grootste internasionale landbouskou wat vroeër vanjaar in Frankryk gehou is, het ’n vergrote Europese mark reeds sy eerste gestalte begin aanneem. Op die tydstip dat Frankryk sy arms oopgooi om Brittanje (saam met Noorweë, Denemarke en Ierland) in die vergrote Europese Ekonomiese Gemeenskap (EEG) te verwelkom, is hy terselfdertyd besig om sy deure oop te maak vir ekonomiese mededinging op landbougebied.

Maar dat die Franse op landbougebied deeglik hul man teen hul huidige en toekomstige EEG-vennote sal kan staan, het duidelik geblyk op die internasionale salon van landbouprodukte en -aangeleenthede. Hierdie landboutentoonstelling, die heel eerste in sy soort en formaat, is in Maart in Parys, Frankryk, gehou. (Die skou, vandag die Paris International Agricultural Show, is steeds die grootste binnenshuise skou ter wêreld.)

Tien lande, waaronder België, Nederland, Luxemburg, Wes-Duitsland, Oostenryk, Italië, Frankryk en natuurlik ook Brittanje en Ierland, het toe die kans waargeneem om ’n week lank meer as ’n miljoen besoekers uit 40 lande met hul diere en landbouprodukte te beïndruk.

“’n Gemeenskaplike mark beteken nie slegs dat produkte uitgeruil moet word nie . . . daarvoor sou ’n sone van vrye verkeer voldoende gewees het.

“’n Gemeenskap bedoel ook dat ’n mens voorrang gee, dat jy saamstaan en soet en suur saam sal sluk, en dat jy mekaar beter sal leer ken en beter verstaan. Dít is die verheffende avontuur van ’n Europese Ekonomiese Gemeenskap (die voorganger van die Europese Unie),” het mnr. Michel Cointat, Franse minister van landbou, op die skou gesê.

“Een van die dae in Frankryk!” Dié parmantige aankondiging onder die lewensgroot foto van ’n Border Leicesterram by die Engelse paviljoen het duidelik vir die besoeker opgesom dat Brittanje besig is om reeds baie vrypostig aan die deur van Europa te klop.

“Nie so gou nie,” het die Franse teruggekap. Want jy moet onthou dat hierdie land net soveel hindernisse te bowe moet kom as sy amper-buurman oorkant die Kanaal om “Europa” ’n werklikheid te maak. —JANBADENHORST

TYD OM TE PROE! By die wynvate en die druiwestalletjies was die atmosfeer buitengewoon vrolik. Dit kon nie anders nie, want die proe was verniet. Hier skink ’n mooi nooi ’n paar glasies lafenis vir twee moeë skougangers.