CORTEVA OPEN NUWE LABORATORIUM IN PRETORIA
CORTEVA AGRISCIENCE se nuwe saadbehandelingslaboratorium in Rosslyn, Pretoria, is een van net ses van dié maatskappy wêreldwyd.
Corteva Agriscience sê bedryfstoonaangewende toerusting sal by sy nuwe Centre for Seed Applied Technologies(CSAT) laboratorium in Pretoria ingespan word, waar spesifiek aandag gegee gaan word aan resep-ontwikkeling en veiligheidstoetsing van saadbehandelingsoplossings.
Die laboratorium, wat deel is van Corteva se internasionale CSAT-netwerk, is op 5 Mei amptelik geopen.
Die werk by die laboratorium is gerig op verbeterde prestasie en toegang tot hoëgehaltesaad vir graanprodusente in Afrika en die Midde-Ooste.
Mnr. Venkata Subbarao Kolli, hoof van Corteva Agriscience
in Afrika en die Midde-Ooste, het met die opening gesê die belegging wys dat die maatskappy verbind is tot die landbou in die streek en voortgesette navorsing en ontwikkeling.
Dit toon die maatskappy se strewe om opbrengs deur die gebruik van die jongste tegnologie te verhoog, lewensbestaan te verbeter en volgehoue voedselsekerheid te verseker.
Die maatskappy sê saadbehandeling behels die toediening van chemiese of biologiese middels, soos swam- en insekdoders, op die oppervan die saad, om saad en saailinge te beskerm teen insekte, swamsiektes en grondgedraagde siektes.
Saadbehandeling help om saad- en plantgesondheid, asook ontkiemingskoerse te verbeter, plante vanuit die staanspoor te beskerm wanneer hulle die weerloosste is vir insekte en siektes, en die waarskynlikheid van ’n gehalte- en verbeterde oes te verhoog.
Corteva sê danksy saadbehandeling is doeltreffende en toegespitste gebruik van aktiewe bestanddele moontlik.
Dit verminder die totale
hoeveelheid plaagdoders wat nodig is, en help sodoende om biodiversiteit en bestuiwers te bewaar en volhoubare landbou te bevorder.
GEHALTE
Volgens mnr. Tony Esmeraldo, sakedirekteur van Corteva Agriscience in Suid-Afrika, versterk die CSAT-laboratorium die maatskappy se aanbod in die saadproduksiesegment.
Die Rosslyn-perseel het gevorderde toerusting waarmee verskeie toetse uitgevoer kan word om die gehalte van saadbehandeling te verseker. Die laboratorium sal Corteva se saadhandelsmerke Pannar® en Pioneer® bedien, asook ander bedryfsmedewerkers om nuwe saadbehandelingsoplossings te skep.
Volgens Kolli is daar beduidende geleentheid om biotegnologie-oplossings in die streek uit te brei.
Die maatskappy het reeds ’n aantal produkte wat gunstig is vir die grond- en klimaatskenmerke van Afrika en die Midde-Ooste, maar daar is ruimte vir baie meer markvooruitgang.