INTERNASIONALE LANDBOUNUUS

1 NIEU-SEELAND | GM koring goedgekeur

Die voedselreguleerders van Nieu-Seeland en Australië (FSANZ) het ingevoerde koringprodukte wat met ’n geneties gemodifiseerde kultivar geproduseer is, goedgekeur vir menslike gebruik. Nie een van dié twee lande laat tans sy boere toe om die betrokke kultivar, wat deur Argentinië se Bioceres Crop Solutions ontwikkel is, te verbou nie. Die kultivar is ontwikkel om teen droogte en die onkruiddoder glifosaat verdraagsaam te wees. In sy goedkeuringsverslag noem FSANZ dat Bioceres-koring se opbrengs 20% hoër is as konvensionele koring in tye van waterstres, en Grain Producers South Australia sê GM koring het die potensiaal om volhoubaarheid en winsgewendheid te verhoog. — Successful Farming/Ag Insider

2 OEKRAÏNE | Kanada wil help met graan

Kanada gaan Oekraïne help planne beraam om van dié land se opgebergde graan uit te voer. Nagenoeg 25 miljoen ton graan is in Oekraïne vasgekeer weens infrastruktuurskade en blokkades van Swartseehawens te midde van die Russiese inval. Mnr. Justin Trudeau, eerste minister van Kanada, en me. Melanie Joly, minister van buitelandse sake, het gesê verskeie opsies word oorweeg om graan uit Oekraïne te kry en ’n wêreldwye voedselsekerheidskrisis af te weer. Een opsie is deur hawens op die Donaurivier, en ook deur die Bosporus. Ontleders waarsku dat Oekraïne erge tekorte aan opbergingsvermoë sal ervaar in die 2022-’23-seisoen weens ’n skerp daling in uitvoer. — Reuters

3 AUSTRALIË Goedkoper om dié avo’s weg te gooi

Groot hoeveelhede avokado’s word in die verre noorde van Queensland weggegooi om te vrot omdat die aanbod die vraag ver oorskry. Markpryse het drasties gedaal omdat die Queensland-avokadoseisoen oorvleuel het met Wes-Australië s’n. Mnr. Joe Moro, voorsitter van FNQ Growers en self ’n avokadoboer, sê om die ryp vrugte te laat vrot, is dikwels die ekonomiesste besluit vir boere, onder meer oor die markprys, substandaard gehalte en ’n ooraanbod. Die verre noorde van Queensland het tradisioneel sowat twee derdes van Australië se avokado’s geproduseer, maar vanjaar het ’n oorvloed vrugte uit Wes-Australië vir die tweede agtereenvolgende jaar ’n ooraanbod veroorsaak. Australië se avokadoproduksie het die afgelope tien jaar verdubbel.