EEN GROOTTE PAS NIE ALMAL NIE
Besproeiing is ’n baie komplekse veld en daar is nie ’n enkele oplossing wat die beste in alle gevalle is nie. Selfs vir ’n gegewe toepassing is daar verskeie werkbare oplossings en nie eens noodwendig ’n enkele een wat uitstaan nie.
Behoorlike bestuur van ’n besproeiingstelsel is minstens net so belangrik soos die seleksie van die tegnologie wat aangewend word, en ’n korrekte ontwerp.
Die aanbiedings by die Suid-Afrikaanse Besproeiingsinstituut (Sabi) se onlangse kongres in Gqeberha was hoogs tegnies en van ’n uitstekende standaard.
Dit is duidelik dat baie vooruitgang gemaak is met toerusting en praktyke om besproeiing na ’n volgende vlak te neem.
Terwyl water- en energiebesparings dikwels voorkeuroorweging kry by besluitneming, is besproeiingsdoeltreffendheid of waterverbruiksdoeltreffendheid ’n baie beter maatstaf van suksesvolle besproeiing. Dit beteken die keuse van die tegnologie, die ontwerp en die bestuurspraktyke behoort daarop gerig te wees om die opbrengs per kubieke meter besproeiingswater wat toegedien word, optimaal te verhoog.
’n Belangrike suksesfaktor is dus hoe bestuurbaar ’n stelsel is. Hiervoor is heelwat nuwe tegnologie beskikbaar wat aangewend kan word. Besproeiing moet ook lang termyn volhoubaar gedoen word – soos in verskeie aanbiedings by SABI se kongres beklemtoon is. Bemesting, dreinering, grond- en plantgesondheid moet alles in ag geneem word. Hierbenewens is die betroubaarheid en ondersteuning van die stelsel van deurslaggewende belang. ’n Mislukking van die besproeiingstelsel in die middel van die seisoen kan katastrofiese gevolge hê.
Besproeiing moet dus omsigtig en met die samewerking van kundige en betroubare besproeiingspesialiste aangewend word om die voordele te behaal en suksesvolle boerdery te verseker. Oor die volgende paar weke plaas Landbouweekblad hoogtepunte van die konferensie.