2022-sitrusseisoen kom stadiger uit die blokke
VANJAAR se sitrusuitvoertydperk het stadiger begin as in die vorige twee jaar.
Mnr. Justin Chadwick, uitvoerende hoof van die SuiderAfrikaanse Sitruskwekersvereniging,
skryf in sy weeklikse nuusbrief dat daar heelwat redes is vir die vertraging. Omdat die vloede in KwaZulu-Natal met die openbare vakansiedae in April saamgeval het, het baie sitruskwekers besluit om oesbedrywighede tot verlede week uit te stel.
Gewelddadige betogings in die Oos-Kaap het ook sitruspaktyd verlore laat gaan.
Waar daar verlede jaar teen week 18 reeds 3,9 miljoen kartonhouers (15 kg elk) pomelo’s verskeep is, is vanjaar nog net 2,8 miljoen kartonhouers verskeep. Altesaam 1,9 miljoen
kartonhouers mandaryne en 7,3 miljoen kartonhouers suurlemoene is in 2021 teen die einde van week 18 verskeep, teenoor 1,3 miljoen kartonhouers mandaryne en 4,8 miljoen kartonhouers suurlemoene vanjaar.
Chadwick meen sitruspryvan wat nie juis gestyg het nie, terwyl produksiekoste toeneem, kan ook veroorsaak dat sitruskwekers marginale vrugte terughou.
Volgens hom sal daar in die volgende paar weke meer inligting wees, veral omdat daar berigte is dat meer vragmotors in die Durbanhawe aankom.
Chadwick skryf dat sitruskwekers die vereniging gestig het om deur navorsing toegang tot nuwe markte te kry en te behou, en te verseker dat die markte ten beste bedien word.
Deesdae ervaar die sitrusbedryf heelwat marktoegangsprobleme. Dit sluit in druk op sy vermoë om verpakte vrugte by en deur die hawe en op skepe te kry, die beskikbaarheid van hawetoerusting en verskepingsgeleenthede, en vragkoste wat die hoogte inskiet.