Mchunu beloof óók meer spoed met lisensies
MINSTENS 80% van waterlisensie-aansoeke sal in die huidige boekjaar van die departement van water en sanitasie binne 90 dae verwerk word, het mnr. Senzo Mchunu, minister van water en sanitasie, in sy onlangse begrotingsrede in die parlement gesê.
Pres. Cyril Ramaphosa het vanjaar in sy staatsrede gesê dis belangrik vir groei en belegging dat onnodige rompslomp uit die weg geruim moet word, en het ’n teiken gestel dat aansoeke om waterlisensies binne 90 dae verwerk moet word.
Volgens Mchunu het die departement ’n deeglike studie gedoen om die redes vir vertragings in die uitreiking van lisensies te bepaal. ’n Omvattende verbeteringsplan word nou in werking gestel.
“Ons het bykomende poste in ons struktuur geskep vir die verwerking van lisensie-aansoeke, sakeprosesse vir lisensiëring
2 Junie 2022 verbeter, die inligtingstegnologiestelsels vir lisensiëring verbeter, en personeel word tans opgelei.”
BEGROTING
Die departement se begroting vir die huidige en volgende twee boekjare is onderskeidelik R18,5 miljard, R20,1 miljard en R20,9 miljard.
’n Voorwaardelike infrastruktuurtoekenning van R37,4 miljard vir munisipale waterdienste is by die mediumtermyn-bestedingsraamwerk ingesluit. Dit sluit ’n toewysing in van R19 miljard vir streeksgrootmaat-infrastruktuur, en een van R14 miljard vir waterdiensteinfrastruktuur. Eersgenoemde sal aan 113 projekte landwyd bestee word en laasgenoemde aan 200 projekte.
“Dit is teenstrydig dat munisipale waterdienste bly agteruitgaan, hoewel daar hierdie beduidende toewysings is. Ons gaan dit in die toekoms deur die nodige ingryping stopsit, wat sal verseker dat water gelewer word,” het Mchunu gesê.
Die tweede gedeelte van die departement se begroting is vir
waterverhandelingsentiteit, wat grootliks op inkomste uit die verkoop van water staatmaak. Daaraan is R9,55 miljard in die mediumtermyn-bestedingsraamwerk toegewys vir die ontwikkeling en bestuur van die nasionale waterhulpbroninfrastruktuur. Die entiteit se kliënte skuld hom nagenoeg R24,57 miljard. Munisipaliteite en waterrade is verantwoordelik vir 65% hiervan.
Mchunu het gesê dit is noodsaaklik dat die regering aandag gee aan die probleem van swak inkomstebestuur en skuld in die watersektor. Die departement werk saam met die nasionale tesourie, die departement van samewerkende regering en tradisionele sake, en die Suid-Afrikaanse vereniging vir plaaslike regering aan oplossings.
“Die onderliggende probleem waarop ons ons moet toespits, is swak rekeninge en invordering op munisipale vlak.”
Mchunu het toegegee dat die departement histories sy toegekende begroting onderbestee het, veral vir infrastruktuurprojekte. “Dit is onaanvaarbaar gegewe die water- en sanitasieprobleme in die land.” Topamptenare in die departement gee nou aandag aan onder meer die verbetering van projekbestuur.