VRAAG NA VARS KNOFFEL STYG

Die vraag na vars knoffel neem in Suid-Afrika toe, maar dit is tans ’n onderbenutte nismark.

Mnr. Derick Immelman van die kommersiële saadverskaffers Garlic Growers by Krugersdorp, sê die produksie van vars en gedroogde knoffel neem toe.

Klein produsente kan dié geleentheid benut om ’n goeie inkomste binne ’n betreklik kort tydperk uit dié hoëwaardegewas te verdien.

’n Produsent wat oor vyf jaar sy aanvanklike produksie op sowat 600 m2 (sowat 24 m x 24 m) stelselmatig verdubbel, en sowat 20% van die opbrengs jaarliks verkoop, kan ná jaar vyf ’n totale oes van 13 miljoen knoffelhuisies of meer as 2,5 miljoen knolle lewer. Dié knoffel kan óf as saad herplant word óf ná vyf jaar teen ’n minimale prys van R1 per knol verkoop word. Dit kan ’n bruto opbrengs van meer as R2,5 miljoen oplewer.

Volgens Immelman kan ’n produsent sy produksie met 10 000 saadknolle in jaar een op ’n oppervlak van slegs sowat 600 m2 begin. Die geprojekteerde opbrengs is sowat 50 000 saadknolle waarvan 20% verkoop kan word.

Die produksie-oppervlak vir die oorblywende 40 000 saadknolle moet daarna op sowat 50 m x 50 m vermeerder word.

Vir die produksie van knoffel word sanderige grond aanbeveel waarin onkruid maklik verwyder kan word en die oesproses vergemaklik. Sowat 25 mm water is weekliks of 400 mm per groeityd nodig.