‘Klein vertakking’ betaal maandeliks die rekeninge
Hoewel kleiner boere die melkbedryf op groot skaal verlaat, sorg dit vir mnr. Jacques Theron van Barrydale vir broodnodige kontantvloei in moeilike klimaatsomstandighede. Dié syferman wat in die stad grootgeword het, pas ook ’n interessante weiding- en vo
Wat begin het met ses Jersey-koeie in 1972, is vandag ’n standhoudende kontantvloei vir mnr. Jacques Theron van die plaas Helderstroom by Barrydale.
“Volgens vandag se norme is die melkery klein, maar dit was desnieteenstaande oor die jare ’n vaste bron van kontantvloei in swaar tye.”
Theron, wat in vennootskap met sy seun, Cobie, vrugte vir die verwerkingsbedryf, vars mark en uitvoermark kweek, het tans sowat 170 Jerseykoeie en -verse wat gemelk word, hoewel dié getal in ’n stadium sowat 220 lakterende koeie was. Theron was al ’n paar keer ’n kandidaat vir die eerbewys as die Landbounavorsingsraad se Melkboer van die Jaar.
Hoekom melk ’n klein melkboer soos hy steeds in ’n tyd dat melkboerderye groter word en kleiner boere tou opgooi omdat produksiekoste styg en produsentepryse nie daarmee tred hou nie?
“As ek nie gemelk het nie, sou ek nie kop bo water kon hou nie. Melk verseker ’n volgehoue kontantvloei, al is die winsmarge nie hoog nie.”
Dit is duur om ’n nuwe vrugteboord te vestig. Dit kom eers ná drie tot vyf jaar in produksie en dan dek dit aanvanklik net die vestigingskoste.
“As daar misoeste kom weens hael of droogte, is dit elke keer die melkery wat ons daardeur dra.”
Hy sê beeste se ander voordeel word dikwels misgekyk.
“Beesmis is perfek vir die bemesting van vrugteboorde. Toe iemand my melkery wou koop, het somme gewys ek bespaar duisende rande jaarliks net aan bemesting. Ek kry beesmis gratis. As ek geld gelykstaande aan die waarde daarvan aan kunsmis moet bestee, sal dit my produksiekoste aan die vrugtekant, asook vir die aangeplante weiding die hoogte laat inskiet. Beesmis is die perfekte resep vir grondgesondheid – iets waarop ek baie gesteld is.”
Om goeie melkproduksie te handhaaf, is uitstekende weiding noodsaaklik.
As jy genoeg kos het vir tien koeie, sal jy meer geld maak as jy net nege melk pleks van probeer om elf diere daarop te melk, is die beginsel waarop Theron sy diere se voeding bestuur.
GEEN VOER GAAN VERLORE
Voeding is die kern van ’n melkery se sukses, maar ’n mens moet dit reg doen. Daarom is ’n unieke stelsel van wei- en “slaaptyd” met uitstekende resultate mettertyd ontwikkel. Koeie wei net ses