ONSEKERHEID OOR UITVOER PLAAS DEMPER OP PRYSE

Onsekerheid oor die uitvoer van sybokhaar na China het ’n demper geplaas op die jongste sybokhaarpryse. Volgens House of Fibre het die Chinese en SuidAfrikaanse staatsamptenare aangekondig dat die uitvoerverbod op diere met gesplete hoewe en hul produkte vanweë die bek-enklouseeruitbreking in Suid-Afrika ook bokhaar insluit.

“Die verbod was onverwags, aangesien bykans alle bokhaar in Suid-Afrika verwerk word, met bokhaar wat uitgesluit moet word van die verbod.”

Afgesien van die onsekerheid oor uitvoer na China, is die Europese mark ook onder druk weens die voortslepende oorlog tussen Rusland en Oekraïne, sê Sybokhaar Suid-Afrika in sy jongste verslag.

Pryse is egter steeds op rekordhoogtes, met die gemiddelde pryse wat op die vyfde veiling van die somerseisoen ongeveer 5% hoër was as die ooreenstemmende veiling ’n jaar gelede. Sybokhaarpryse het op die vierde veiling van die seisoen vir die eerste keer gedaal.

Die pryse van kleinbokkiehaar (R691,55/kg) vir die vyfde veiling was ongeveer 15% laer vergeleke met ’n jaar gelede.

Jongbokkiehaar (R495,72/kg) is ongeveer 6% laer.

Grootbokhaar (R382,47/kg vir fyn en R359,82/kg vir sterk bokhaar) vertoon egter beter as ’n jaar gelede, met fyn grootbokhaar wat 5% beter vertoon.