BUL BEHAAL R260 000

’n Bul het die hoogste prys van R260 000 behaal op die 16de produksieveiling van die Vlakte Bonsmara-groep wat op die plaas Doornpan van mnr. Tian Kruger by Roedtan gehou is.

Kruger se TKB Bonsmarastoetery en die Frits Kroonboerdery van Morolong is die kopers. Die verkoper is mnr. Andries Kruger van Kameeldoring Bonsmaras, Marble Hall. Die 25 stoetbulle wat verkoop is, het gemiddeld R81 485 behaal.

Ál die vroulike diere op die veiling was kommersiële diere. Die duurste koei is vir R52 000 deur mnr. Leon-Frits Riekert, LFR Bonsmaras, Roedtan, aan dr. Juan Pera van Bryanston verkoop.

Die hoogste pryse (met die gemiddelde pryse tussen hakies) was: R14 500 (R12 518) vir speenkalwers, R22 500 (R17 730) vir nie-dragtige verse, R35 000 (R32 091) vir koeie met kalwers, R52 000 (R30 314) vir dragtige koeie, en R41 000 (R36 696) vir dragtige koeie met kalwers.

FOTO: VERSKAF Hierdie Bonsmara-bul is op die Vlakte Bonsmara-produksieveiling vir R260 000 verkoop. Dit was die groep se 16de veiling en die tweede van die jaar.

FOTO: CHARL VAN ROOYEN Die duurste bul op die Vlakte Bonsmara-produksieveiling is deur mnr. Andries Kruger (naasregs) vir R260 000 aan mnre. Tian Kruger (regs) en Frits Kroon (naaslinks) verkoop. Links is mnr. Douw Steyn, Kruger se kuddebestuurder.