6 VAN DIE BESTES

Mnr. Naas van der Merwe was tot onlangs uitvoerende hoof van die landgoed Môrester in die Mnr. Naas van der Merwe Koue Bokkeveld. Hy was een van die sprekers op Landbouweekblad en Partners in Agri Land Solutions (PALS) se grondsimposium op Ceres in 2019. Hier is sy “ses van die beste”-wyshede vir nuwegenerasie-boere:

1. Moet nooit moed verloor nie. In boerdery begin jy elke jaar van voor af.

2. Leiers moet rigting gee en probleme as geleenthede gebruik. Duidelike verwagtinge, ambisies en eindresultate moet uiteengesit word.

3. Vier elke sukses met almal. Nie net probleme raak ons almal nie – geniet daarom ook die vreugdes saam. Anders byt geloofwaardigheid en optimisme in die stof.

4. Leiers kry nie sommerso respek nie. Jy kry dit deur vertroue en integriteit te skep deur alles wat jy doen. En, onthou, jy kan ook alles verloor met een ondeurdagte woord of daad.

5. ’n Leier wat dien, sal ’n gunstige invloed op sy mense hê. Veral as hy of sy ook na hulle omsien buite werksomstandighede. Die spreekwoordelike ekstra myl wat jy met iemand loop, is alte dikwels die verskil tussen sukses en vreugde aan die een kant, of mislukking en moedeloosheid aan die ander kant.

6. Gebruik kundige konsultante vir ’n gesonde, korporatiewe bestuurspraktyk. Dit is ’n reusebelegging in volhoubare sukses.