Skaapboer verstom oor karkaspryse
Ondanks ’n vyf jaar lange droogte het mnr. Bertus Steenkamp van Carnarvon byna die breedte van Suid-Afrika aangepak om sy skape teen dié van ander topskaapboere te meet, en hy is ryklik beloon vir sy moeite.
Terwyl sy wenkarkasse onder die afslaer se hamer gekom het teen pryse wat hy nog nooit in sy lewe behaal het nie, was ’n Noord-Kaapse skaapboer wat meer as 1 000 km afgelê het om aan die Royalskou se wêreldbekende karkaskompetisie en -veiling deel te neem, sigbaar emosioneel.
Op dié skou, wat in Pietermaritzburg, KwaZulu-Natal, gehou word, het die Dorper-lammers van mnr. Bertus Steenkamp van Carnarvon in die kategorieë kampioenkarkas, eerste reserwekampioenkarkas en kampioen-groep karkasse gewen.
Hy het aan Landbouweekblad gesê hy was bereid om die lang reis te aan te pak, want die Royalskou se karkaskompetisie is gesog en stel hom ook in staat om sy produksiepraktyke te vergelyk met dié van ander topskaapvleisprodusente.
Steenkamp se kampioenkarkas (met ’n gewig van 23,3 kg en ’n punt van 97,15%) is vir R350/kg verkoop. Sy eerste reserwekampioen-karkas (25,2 kg; 95%) is vir R360/kg verkoop. Sy kampioen-groep karkasse is vir R300/kg verkoop.
“Die pryse wat hier vir my karkasse betaal is, is die beste wat ek nóg ontvang het. Dit is veral verstommend omdat ons uit ’n droogte van vyf jaar kom wat eers in Oktober 2021 geëindig het. Ons lammers lyk so goed omdat ons weiding weer mooi groen is.”
Die eerste reserwekampioen-groep karkasse was Ile de France-lammers van mnr. Harry Meyer van Witbank, Mpumalanga. Hulle is vir R270/kg verkoop.
Die kampioen in die kategorie vir Europese teelmateriaal is geteel deur mnr. Ernst Woest van Rayton, Gauteng. Sy Ile de France-karkas (19,1 kg; 93,91%) is vir R320/kg verkoop. ’n Ile de France-karkas (19,2 kg; 93,43%) van me. Regina Harmse van Ermelo, Mpumalanga, is as reserwekampioen aangewys. Dit is vir R380/kg verkoop.
Elke bekroonde lamkarkas op die Royalskou, saam met bykans 200 ander lamkarkasse, is almal deur Suid-Afrika se Checkstar/Hypercheck Groep (CHG) van kleinhandelkettingwinkels gekoop. Mnr. Andrew Coppin, hoof van die groep se varsvoedselafdeling, was die bieër.
Al die lams- en beesvleisinskrywings is deur Halaal Fresh Meats van Thornville, KwaZulu-Natal, verwerk.
Coppin het gesê dat CHG vasbeslote was om van die beste lamkarkasse wat Suid-Afrika kan bied, te koop. Dit was om die groep se klante te wys dat dit CHG se doelwit is om hulle altyd van die beste halaal vleis moontlik te voorsien.
STEUN VIR BOERE NOU ’N VOORRANGSAAK
“Ons wil ook ons ondersteuning wys vir al die boere wat hard werk om voedsel te produseer. Ons is bly om elke boer wat lamkarkasse vir hierdie kompetisie ingeskryf het, te kon ondersteun. Ons het tans ’n groot advertensieveldtog om ons ondersteuning aan ons klante en verskaffers ten toon te stel,” het Coppin gesê.
In die kompetisie se beesvleiskategorie was die kampioenkarkas ’n Beefmaster-karkas (247,5 kg; 93,78%). Dit is deur die landboukollege Weston op Mooirivier, KwaZulu-Natal, geteel en vir R72/kg aan Kennedy Caterers in Durban verkoop. Die eerste reserwekampioenkarkas was ’n Beefmaster (235,5 kg; 92,19%) wat deur die landboukollege Cedara by Howick geteel en vir R65/kg verkoop is.
Cedara het ook die kampioen-groep karkasse ingeskryf. Dit was Beefmasters wat vir R60/kg verkoop is.
Weston het die eerste reserwekampioen-groep karkasse geteel, ook Beefmasters, wat vir R62,50/kg verkoop is.
Die kampioen-superbeeskarkas, ’n Bonsmara (555,8 kg; 89,89%), is teen R60/kg verkoop. Dit is deur mnr. Jason Stay van Underberg, KwaZulu-Natal, ingeskryf.
Die eerste reserwekampioen-superbeeskarkas, ’n Bonsmara (516 kg; 89,73%) van Ferrero Bonsmaras van Harrismith, is vir R60/kg verkoop.
WENVARKE
Die kampioen-varkkarkas was ’n Topigs Norsvin (96,9 kg; 95,7%) wat deur die Butt-boerdery van Kamberg, KwaZulu-Natal, geteel en vir R30/kg aan Kennedy Caterers verkoop is. Dié boerdery het ook die eerste reserwekampioen-karkas (89,9 kg; 93,5%) vir R31/kg, die tweede reserwekampioen-karkas (87,1 kg; 92,58%) vir R30/kg en die kampioen-groep karkasse vir R25/kg verkoop. Hulle was almal van die Topigs Norsvin-ras.
Die eerste reserwekampioen-groep varkkarkasse was van die PIC-ras. Dit is deur die Benson-groep van Karkloof, KwaZulu-Natal, ingeskryf en vir R18/kg verkoop.
’n Danbred-varkkarkas (66,4 kg; 92,43%) wat deur mnr. Lindo Sishi van die Soguba-boerdery by Bulwer, KwaZulu-Natal, ingeskryf is, het in die kategorie kampioen-karkas deur opkomende boere gewen. Dit is vir R30/kg aan Kennedy Caterers verkoop. Die Soguba-boerdery het ook die eerste reserwekampioen in hierdie kategorie opgelewer. Dit was ’n Danbred (65,7 kg; 91,17%) wat vir R25/kg verkoop is.
Landbouweekblad was die borg van die Royalskou se karkaskompetisie en -veiling.