BAKPLAAT-PIZZA
JY HET NODIG
Deeg
500 ml (2 koppies) bruismeel 2 ml (1/2 teelepel) sout
80 ml (1/3 koppie) koue botter of margarien, in blokkies gesny
250 ml (1 koppie) melk
Bolaag
375 ml (1 1/2 koppie) tamatie-pizzasous 250 ml (1 koppie) gekrummelde fetakaas
125 ml (1/2 koppie) gesnipperde kouevleis van jou keuse 250 ml (1 koppie) gerasperde mozzarellakaas
5 ml (1 teelepel) droë Italiaanse kruie
Voor jy begin: Voorverhit die oond tot 200 °C en smeer ’n bakplaat liggies met olie.
STAP1
Sif die bruismeel en sout in ’n mengbak. Voeg die blokkies botter of margarien by en gebruik jou vingerpunte om dit by die bruismeel in te vryf. Hou aan vryf totdat die mengsel later soos growwe broodkrummels lyk.
STAP 2
Voeg die melk bietjie vir bietjie by die meelmengsel, terwyl jy dit met ’n tafelmes meng. Ons noem hierdie tegniek: om vloeistof in te sny. Moenie al die melk gelyk byvoeg nie, want jy gaan dalk minder as 250 ml nodig hê. Voeg net genoeg by sodat ’n deeg vorm.
STAP 3
Druk die deeg met jou hande bymekaar en knie dit liggies in die bak, sodat dit mooi bymekaarkom in ’n bal. Dit moet ’n sagte deeg wees, maar nie taai of klam nie.
STAP4
Druk die deeg egalig plat in die gesmeerde bakplaat. Gebruik jou hande hiervoor en maak seker dat die deeg oraloor ewe dik is.
STAP5
Skep nou die tamatiepizzasous met ’n lepel op die deeg en versprei dit egalig oor die hele oppervlak.
STAP6
Sprinkel die fetakaas oor die tamatiesous. Snipper die vleis met ’n kombuisskêr en strooi dit saam met die mozzarellakaas oor. Sprinkel die kruie laaste oor. Bak vir 20-25 minute tot deurgaar. Sit dadelik voor.
Lewer 4 groot porsies.