Teelbeleid lei tot sukses BEEFMASTERS
Bos Blanco streef na ’n ekonomiese en funksioneel doeltreffende koeikudde.
Bos Blanco het deur die jare ’n reputasie opgebou vir sy Beefmastertopteelmateriaal. Van dié stoetery se teelmateriaal is al uitgevoer na Zimbabwe, Zambië, Botswana, Namibië en Mosambiek. Bos Blanco hou ook die rekordpryse vir onder meer die duurste bul en koei met kalf.
Hierdie sukses is nie ’n gelukskoot nie. Seleksie vir aanpasbaarheid, vrugbaarheid, melkproduksie, bouvorm en groei van die kalf kry voorkeur. Aanpasbaarheid van die koeikudde is dus deurslaggewend vir mnr. Dennis Staal, wat die Bos Blanco Beefmaster-stoetery naby Kroonstad bedryf. Dennis boer saam met sy broer, mnr. Burnie Staal, wat
in beheer is van Bos Blanco se Brahman-stoetery.
By Bos Blanco word daarna gestreef om genetiese lyne wat mekaar komplementeer, te paar vir die beste moontlike voorspelbare resultate. Baie klem word gelê op koeilyne, veral met die keuse van ver
vangingsbulle. Daar word ook bulle uit verskillende lyne teruggehou om sodoende die genetiese basis te verbreed.
“Met KI-programme gebruik ons ook nuwe teelmateriaal by geselekteerde koeie om vervangingsbulle uit ander genetiese samestellings te probeer teel.”
Volgens Dennis maak besonderse moedereienskappe, geboortegemak en goeie melkproduksie van die Beefmaster ’n maklike ras om mee te boer.
“Danksy goeie melkproduksie deur die koei is dit maklik om speengewig van 260 kg tot 320 kg op sewe maande te sien. Kalwers kan dus in droë jare jonger gespeen word sodat die koei kondisie kan herwin vóór die strawwe winter.”
Bos Blanco hou jaarliks in April ’n produksieveiling vir vroulike Beefmasters, en in Augustus sy bulveiling wat onder meer uit 80 Beefmaster-bulle bestaan.
NAVRAE: Mnr. Dennis Staal, 082 828 1082, e-pos: dennis@ bosblanco.co.za