SA sojas op pad China toe
DAAR is vanjaar reeds plaaslike sojabone vir uitvoer beskikbaar en een van die moontlike uitvoerbestemmings is China. Suid-Afrika voldoen aan al die protokolvereistes vir dié uitvoer en daar word net gewag op die finale goedkeuring, sê mnr. Corné Louw, hoof van toegepaste ekonomie en lededienste by Graan SA.
Volgens die jongste oesskattings het Suid-Afrika hierdie seisoen die grootste sojaboonoes nóg, van 1,93 miljoen ton, en die tweede grootste sonneblomoes van 963 000 ton.
“Die verwagting is dat Suid-Afrika van 850 000 ton tot 920 000 ton sonneblom en 1,55 miljoen ton sojabone sal kan pers,” sê Louw.
Daar sal sowat 380 000 ton sojabone beskikbaar wees vir uitvoer. Louw sê in die lig van ’n groot verwagte toename in aanplantings in die nuwe seisoen sal daar volgende jaar heelwat meer beskikbaar wees vir uitvoer en daarom word hard gewerk aan uitvoermarkte en die logistiek vir uitvoer.
PLAASLIKE VERBRUIK
Teoreties is Suid-Afrika se parskapasiteit vir sojabone nou sowat 1,8 miljoen ton ná uitbreidings van meer as R2 miljard en vir sonneblom is die kapasiteit sowat 900 000 ton. Met die groot uitbreidings in sojaboonaanplantings wat in die volgende seisoen verwag word, kan dit die plaaslike parskapasiteit oorskry.
“Ons voorsien dat baie meer van ons eie oliekoek volgende jaar sal gaan na kusgebiede wat tot dusver oliekoek ingevoer het. Met die hoë oliepryse internasionaal maak dit nou meer sin om alles te verwerk wat ons plaaslik het. Ons sal dan sien wat is die werklike parskapasiteit teenoor die teorie.”
Dr. Werner Rossouw, direkteur van Silostrat, sê die verwagting is dat die plaaslike
sojaboonaanplantings met 150 000 ha tot 200 000 ha sal vermeerder.
WÊRELDNEIGING
Hy sê dit is ’n wêreldwye neiging dat meer sojabone aangeplant gaan word. “Die pryse is op die oomblik baie goed. As ’n mens kyk na die voorseisoenkontrakte wat op die oomblik in Amerika gesluit kan word, is dit die hoogste ooit. Dan is die insetkoste natuurlik ook laer as vir alternatiewe kommoditeite.”
Hy sê die verwagting is dat Amerika sy grootste aanplanting in die geskiedenis gaan hê en daar is gerugte dat China, Brasilië en Argentinië ook minder mielies en meer sojabone gaan plant. Die Amerikaanse departement van landbou se vraag-en-aanbodverslag het in Mei al aangedui dat die wêreldproduksie van sojabone in die 2022-’23-seisoen die hoogste ooit kan wees. Dit behels ’n toename van sowat 45 miljoen ton teenoor hierdie seisoen.